Кыргыз Республикасында трансплантологияны өнүктүрүү саламаттык сактоо системасынын артыкчылыктуу багыттарынын бири болуп калууда. Мамлекеттик колдоонун жана ата мекендик адистердин жогорку кесипкөйлүгүнүн аркасында жогорку технологиялык операциялар бүгүнкү күндө өлкө ичинде ийгиликтүү жүргүзүлүп, жарандардын чет өлкөгө чыгуу зарылдыгын азайтуу менен өмүрүн сактап калууга мүмкүнчүлүк түзүүдө.

Бүгүн, 2026-жылдын 26-мартында Эне жана баланы коргоо улуттук борборунда (ЭжБКУБ) борбордун дарыгерлери тарабынан 29 жаштагы бейтапка кезектеги бөйрөк трансплантациялоо операциясы жасалды. Операция акысыз негизде аткарылды.

Операциянын жүрүшү жана медициналык жардам көрсөтүүнүн уюштурулушу менен саламаттык сактоо министринин орун басары Бакыт Кадыралиев таанышты.

Бейтап 12 ай бою программалык гемодиализде болгон. Өнөкөт гломерулонефритке байланыштуу бөйрөгү функциясын жоготкон. Донор - бейтаптын бир тууган агасы.

Белгиленгендей, 2024-жылдын январь айынан бери мамлекеттин эсебинен 41 акысыз бөйрөк алмаштыруу операциясы жүргүзүлгөн. Жалпысынан 2018–2026-жылдары борбордо 83 трансплантация жасалган.

Борбордун медициналык командасы өнөкөт бөйрөк оорулары менен ооруган бейтаптарды туруктуу негизде кабыл алып, өлкөдө трансплантология багытын өнүктүрүүнү улантууда.

Сапардын алкагында министрдин орун басары ошондой эле 14 жыл мурун бөйрөк алмаштыруу операциясы жасалган бейтап менен жолугушту. Бүгүнкү күндө ал толук кандуу жашоо өткөрүп, иштеп, коомдук жактан активдүү.

Бул мисал трансплантация — бул жөн гана жогорку технологиялык операция эмес, узак жана сапаттуу жашоого болгон чыныгы мүмкүнчүлүк экенин айкын көрсөтөт.