Европа биримдиги Орусиянын 21 авиакомпаниясын учууга кооптуу деген жүйө менен кара тизмеге киргизди. Алардын арасында "Аэрофлот", "Победа", S7, "Россия", "Ютейр" жана "Урал авиакаттамдары" бар.

Эми бул жана башка компаниялардын лайнерлерине шаркетке мүчө өлкөлөрдүн аба майданын колдонууга жана аэропортторуна конууга тыюу салынат.

Евробиримдик түшүндүргөндөй, бул компанияларга караштуу учактардын техникалык абалы үчүн кожоюндары да, учакты өндүргөндөр да жооп беришпейт.

Евробиримдиктин кара тизмесинде буга чейин эле Ирак, Иран, Ооганстан, Кыргызстан жана Судандын авиакомпаниялары бар болчу.

Еврокомиссиянын маалыматына караганда, Москва орус авиакомпанияларына кемелерди тийиштүү эл аралык сертификаттары жок эле учууга уруксат берген.

Евробиримдиктин транспорт маселелери боюнча комиссары Адина Вэлян бул жүргүнчүлөр үчүн кооптуу болушу мүмкүн экенин билдирди.

S7, "Урал авиакаттамдары" Кыргызстанга да каттайт.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg