Европа биримдигине кирген өлкөлөрдүн тышкы иштер министрлери Жакынкы Чыгыштагы кырдаалдын курчушуна байланыштуу өтүп жаткан жыйынында Газа секторунун блокадага алынышына каршы чыгып, гуманитардык коридорлорду ачып, каалоочуларга аймактан чыгып кетүүгө мүмкүнчүлүк берүүгө чакырышты. Бул тууралуу жолугушуунун жыйынтыгы менен сүйлөгөн ЕБ дипломатиясынын башчысы Жозеп Боррель айтканын РИА Новости жазды.

"ТИМ башчылары түзүлгөн оор жагдайды талкуулап, зомбулукту токтотуу, барымтадагыларды бошотуу зарылдыгын белгилешти. Буга катар блокадага, электр кубатынын өчүрүлүшүнө, суу, тамак-аш алчу жолдорду бууп салууга каршы чыгып, гуманитардык коридорлорду ачып, каалагандарга аймактан чыгып кетүү мүмкүнчүлүгүн берүүнү колдошту", — деген Боррель.

Палестина-Израиль чыры

7-октябрда Израилге Газа сектору тараптан чабуул жасалганы боюнча маалыматтар тарады. Аталган өлкөнүн билдиргенине караганда, ХАМАС аскерлери ракета менен жапырт аткылаган соң Израилдин түштүгүндөгү чектерине кирип келген дешүүдө. Аталган уюмдун аскер канаты жарыялаган аскердик операциясын "Аль-Аксы топон суусу", ал эми Израиль тарап "Темир кылыч" деп атады. Өлкөнүн премьер-министри Биньямин Нетаньяху элге кайрылып, Израиль узакка созула турган оор согушка киргенин, мындан улам мобилизациялоо жүрөрүн билдирген.

Израилдин АКШдагы элчилиги берген маалымат боюнча каза тапкан израилдиктердин саны 1000ден ашты. Ал эми Палестинанын Саламаттык сактоо министрлигинин билдирүүсү боюнча, Газа секторунда 900дөн кем эмес киши набыт болгон.

Тараптардын аймактык кызыкчылыгы менен байланышкан палестин-израиль жаңжалы ондогон жылдардан бери региондогу кагылышуунун себепкери болуп келет. СССРдин кийлигишүүсү менен 1947-жылы БУУ Израиль жана Палестина мамлекеттерин түзүү чечимин кабыл алган. Бирок натыйжада Израиль гана түзүлгөн. Тель-Авив эки өлкө принцибине макул болгону менен палестиналык аймактарды бошотпой келет.

Булак: NazarNews.kg