Германиянын жашоочуларынын дээрлик жарымынан көбү мектеп программасына гомосексуалдуу жуптар менен жынысын өзгөрткөндөр тууралуу маалымат киргизүү керек деп эсептейт. Бул тууралуу маалымат IFop компаниясы жүргүзгөн сурамжылоодо көрсөтүлгөн.

АКШ, Франция, Германия жана Улуу Британия өлкөлөрүнүн жашоочуларына гомосексуалдуу жуптар жана жынысын өзгөрткөндөр тууралуу маалыматтарды мектеп программасына киргизүүгө, ошондой эле 16 жашка чейинки балдарга жынысын өзгөртүү үчүн дарылануудан өткөрүүгө мүмкүнчүлүк түзүүгө кандай карай тургандыктары боюнча суроо узатылган. Мындан сырткары, критикалык расалык теория менен "жокко чыгаруу маданияты" боюнча дагы сурамжылашкан.

Респонденттердин дээрлик жарымынан көбү мектептин программасына гомосексуалдуу жуптар менен жынысын өзгөрткөндөр тууралуу маалыматтарды киргизүүнү колдогон. Ал эми аталган өлкөлөрдөгү респонденттердин төрттөн бир бөлүгүнөн үчтөн бир бөлүгүнө чейинкилери "жокко чыгаруу маданиятын", критикалык расалык теорияны жана өспүрүмдөрдүн жынысын өзгөртүү үчүн дарылоо чечимин колдогон.

Мисалы, Германияда гомосексуалдуу жуптар жөнүндөгү маалыматтарды мектеп программасына киргизүүнү респонденттердин 64 пайызы колдогон. Франциядагы, Улуу Британиядагы жана АКШдагы көрсөткүчтөр 48, 52 жана 42 пайызды түзгөн. Жынысты өзгөртүү жөнүндөгү материалдарды мектеп программасына киргизүүнү Германиядагы сурамжылоого катышкандардын 53 пайызы, Франциядагылардын 41, Улуу Британия менен АКШнын 39 жана 40 пайызы колдогон.

2021-жылдын сентябрь айында Улуу Британиянын Апелляциялык соту чечим чыгарган. Ага ылайык, 16 жашка чейинки балдар жыныстык жетилүүнү кечеңдетүү үчүн дарылануудан өтүүгө макулдугун берүүгө укуктуу. Дарылануунун бул түрү жынысты алмаштырууда колдонулат. Германияда бул чечимди респонденттердин 34 пайызы, Францияда 27, Улуу Британияда 30 жана АКШда 36 пайызы колдоду.

Учурда америкалык ЖМКларда "Расалык критикалык теория" көп айтыла баштады. Кээ бирлер бул теория демократияны жакшыртат деп эсептесе, дагы бири адамдарга "расасына" жараша ар түрдүү мамиле жасалып каларын белгилеп, бул демократияга жатпай турганын айтышууда. Францияда респонденттердин 16 пайызы критикалык расалык теорияны колдосо, Германияда бул көрсөткүч көбүрөөк — 24 пайыз. Улуу Британия менен АКШда 19 жана 27 пайызды түздү.

"Жокко чыгаруу маданияты" — бул АКШда пайда болгон феномен. Мында коомдук сферадагы адамдарга, топторго жана уюмдарга каршы комментарий калтыруу. Респонденттерге "жокко чыгаруу маданиятын колдойсузбу"? деген суроо узатылган.

Жалпы жонунан бардык өлкөлөрдө "жокко чыгаруу маданиятына" каршы көз караштагы адамдар бар. Мисалы, АКШ (50%), Британия (49%) жана Германиядагылар (59%) буга каршы. Бир гана Францияда каршы чыккандардын саны аз болду (38%).

Сурамжылоого 18 жаштан жогорку курактагы 4 010 респондент катышты: Франция: 1 010 респондент, Улуу Британия: 996 респондент, Германия: 1 003 респондент, АКШ: 1 001 респондент.

Булак: NazarNews.kg