Европарламент (ЕП) Евробиримдиктин (ЕБ) терең реформаларын колдогон резолюция кабыл алды. Бул тууралуу РИА Новости Европанын келечеги конференциясынын алкагында Европа өлкөлөрүнүн жашоочулары менен коомдук консультациялардын жыйынтыгында кабыл алынган ЕП тараткан документке таянуу менен билдирди.

Сунушталган реформалардын арасында Евробиримдиктин уюштуруу документтерин өзгөртүү да бар.

«Парламент конференциянын жыйынтыгында айтылган амбициялуу жана конструктивдүү сунуштар келишимдерди кайра карап чыгууну, атап айтканда, ЕБ алкагында көбүрөөк жөнөкөйлүктү, ачык-айкындуулукту, отчеттуулукту жана демократияны камсыз кылууну талап кылаарын моюнга алат», - деп айтылат билдирүүдө.

Атап айтканда, жактырылган сунуштардын арасында маанилүү чечимдерди бир добуштан кабыл алуу принцибинин жоюлушу да бар. Европарламенттин депутаттарынын айтымында, бул Евробиримдиктин эффективдүү иштешине тоскоол болууда.

Мындан тышкары, Европарламенттин депутаттарына саламаттыкты сактоо, энергетика, миграция жана коргонуу маселелери боюнча мыйзам чыгаруу демилгесин жана ыйгарым укуктарын берүү сунушталууда. Эми бул маселелер улуттук өкмөттөрдүн карамагында.

Реформаларды киргизүү үчүн ЕП конкреттүү сунуштарды иштеп чыгып, Евробиримдиктин бардык өлкөлөрүнүн өкүлдөрү болгон Евробиримдиктин Кеңешине бериши керек. Европа өлкөлөрүндө да улуттук референдум талап кылынышы мүмкүн.

2022-жылдын январында Еврокеңешке төрагалык кылган Франциянын президенти Эммануэль Макрон Франция Шенген аймагын реформалоону сунуштай турганын айткан. Анын пикиринде, мындай реформа Евробиримдиктин тышкы чек араларын бекемдөө жана миграциялык кризиске каршы туруу үчүн зарыл.

Булак: NazarNews.kg