Анын инаугурациясынан бери эки ай да өтө элек, бирок бул кыска убакыттын ичинде дүйнөнү таң калтырган көптөгөн окуялар болуп өттү: Канадага, Гренландияга жана Панама каналына болгон дооматтар, USAIDдин кыйратылышы, Украинаны тынчтыкка мажбурлоо операциясы. Булардын баары – болгону башталышы.

Дональд Трамптын айрым аракеттери кызыктай жана логикасыздай сезилиши мүмкүн, бирок анын командасы кандай идеяларды карманаарын билген адам үчүн алардын бардыгы түшүнүктүү. Ак үйдүн өзгөчө философиясы тууралуу РИА Новости баяндап берет.

"Америка баарынан жогору" – бул ураанды Трамп биринчи мөөнөтүндө эле активдүү колдонгон, ал изоляционизмди жана экономикалык протекционизмди жактаган. Ошентсе да, инаугурациялык сөзүндө коңшу өлкөлөргө болгон дооматтарын жарыялаганы көптөрдү таң калтырды.

Бул сөздөрдү ал Силикон өрөөнүнүн ири санариптик компанияларынын жетекчилери – Илон Маск, Джефф Безос, Марк Цукерберг жана Сундар Пичайдын курчоосунда айтып жаткан. Технологиялык бизнес өткөн шайлоодо республикачыларга басым жасады. Ушул фактыларды салыштырып көргөн тарыхчылар мындай жыйынтык чыгарышты: жаңы эски президент бир кылым мурдагы концепцияны – технатты ишке ашырууну көздөп жатат.

Бул коомду радикалдуу өзгөртүү концепциясы, ага ылайык бардык бийлик инженерлерге жана илимпоздорго өтүшү керек, ал эми экономиканын негизин акча эмес, энергия түзөт. Бул утопияны ишке ашыруунун негизи катары өткөн кылымдын башында Түндүк Америка (Канада, Мексика, Панама) жана ага кошулган Гренландия каралган. Бул региондун табигый жана адамдык ресурстары толук өзүн-өзү камсыздаган автаркия түзүүгө жетиштүү болмок.

Чынында эле, Канадада пайдалуу кендердин ири запастары бар, Гренландияда сейрек кездешүүчү металлдар, ал эми Панама каналы логистикалык көзкарандысыздыкты камсыздай алат.

Байкоочулардын пикиринде, Трампты Түндүк Американын өзүн-өзү камсыз кылган экономикасын түзүү идеясына пандемия COVID-19 түрткү берген. Анткени ал глобалдык жеткирүү чынжырларын бузуп, АКШнын өзүнүн башкы стратегиялык өнөктөшү жана атаандашы болгон Кытайга көз карандылыгын ачык көрсөткөн.

Трампка эң жакын ишкер – Илон Маск буга чейин эле энергетикалык жана технологиялык жактан көзкарандысыздыкка умтулууда. Анын SpaceX (космостук) жана Tesla (автомобилдик) компаниялары дал ушул багытта иштеп жатат. Кызыгы, Масктын чоң атасы – канадалык Джошуа Холдеман технократиянын активдүү жактоочусу болгон.

Технатка окшош дагы бир концепция бар, ал XXI кылымда пайда болуп, санариптик компаниялар арасында кеңири таралган.