Экс-премьер-министр Феликс Кулов азыркы президент Садыр Жапаровдун 2005-жылы анын шайлоо штабында жана ошол мезгилдеги шайлоодо Курманбек Бакиевдин штабында иштегени тууралуу маалымат боюнча жергиликтүү басылмалардын бирине комментарий берди.

Эскерте кетсек, «Кабар» агенттиги мамлекет башчысы менен болгон кезектеги маегинде журналист Лейла Саралаеванын президент Садыр Жапаров 2005-жылы Курманбек Бакиевдин штабында иштегени тууралуу айткандарына токтолуп, кыска жооп алган.

Маек учурунда президент Жапаров бул билдирүүнү четке кагып, карандай калп экенин билдирген. 

Ал эми, экс-премьер Феликс Кулов бул маалымат боюнча: «Мен Саралаеванын сөздөрүн уккан жокмун, бирок Садыр Жапаров тууралуу сурашты. Мындай маалымат мени таң калтырды. Мен мындай факты бар экенин тастыктадым, бирок ал көпкө иштеген эмес», — деди ал.

Ал 2005-жылдын 24-мартында абактан чыккандан көп өтпөй президенттик шайлоону мөөнөтүнөн мурда өткөрүү маселеси көтөрүлгөнүн эске салды. Алгач Алмазбек Атамбаев Куловго кайрылган, андан кийин Садыр Жапаров менен Чолпон Баекова кошулган. 

«Алар мени президенттикке ат салышууну сунушташты. Мен беш жыл абакта отургандан кийин ден соолугумду калыбына келтирип, саясий кырдаалды түшүнүшүм керек эле. Бирок алардын өжөрлүгү жана башка тарапташтардын колдоосу менен акыры мени ынандырышты. Садыр Жапаров да менин командама кошулду — анын аброю бар, жакшы уюштуруучу жана керектүү байланыштары бар болчу. Ал чындап эле жардам берген», — деген ал. 

Кийин талапкерлигин жарыялаганда Азимбек Бекназаров ага жеке жолугушуу өтүнүчү менен кайрылган. «Ал “Аскар Акаев 14 жыл президент болду, эми кезек түштүктүн өкүлүнө келди” деди. Мен аймактык бөлүнүүнү, трайбализмди колдобойм деп жооп бердим. Буга ал «Силер бул беш жылда көп нерсени жоготтуңар, эл экиге бөлүндү, бул факторду эске алуу керек» деди», — деген Кулов. 

Феликс Кулов Курманбек Бакиев менен тандем түзүүнү сунуштаган Бекназаров экенин кошумчалаган. 

«Мен өзүмдүн командамды чогултуп, көп талкуудан кийин өлкөнү бөлүп-жаруудан сактоо үчүн келишим түздүк. Натыйжада, ар кандай саясий күчтөрдүн башын бириктирген Элдик конгрессти Бакиев уюштурду. Мен өлкөдөгү стабилдүүлүк үчүн премьер-министрликке макул болдум. Менин командам бул чечимди колдоп, штабдын кереги жок болуп калды. Биз акча чогулткан жокпуз, бирок эл өзү колдоп келди», — деди ал.

«Төрт жылдан кийин мурдагы коргоо министри Исмаил Исаков командадан чыгып кеткен. Ал жыйындардын биринде Бакиевдин «Бир жылдан кийин мен Куловду кетирем» деп айтканын айтты, бирок, убакыт көрсөткөндөй, анын айтканы туура болуп чыкты, натыйжада Бакиев бийликтен ажырап калды, мен аны менен көпкө иштешпей калганыма ыраазымын», — деген Кулов.