— Жээнбеков менен Атамбаевдин ортосундагы мамиле күн өткөн сайын салкындап баратат. Эки достун тиреши ачыкка чыгып, чыңалып баратат. Тирешти токтотуп калыша алабы? Улана берсе эмне менен аяктайт?

— Жээнбековдун жакшы сапаты – ал токтоо адам экен. Менимче чырга барбайт. Өзүнүн ишин аткара берет. Атамбаевден айырмасы да публиканын адамы эмес экендигинде. Премьер-министр болуп иштеп турганда дагы көп көзгө көрүнө бербей, өзүнүн ишин аткара берди. Азыр дагы ошол принципти карманат. Атамбаевдин кылгандарына Жээнбеков көңүл деле бурбаса керек. Атамбаев деле азыр өзүнүн абалы кандай экенин түшүнөт да. КСДП фракциясынын депутаттары менен акыркы жолугушуусуна 19 депутат барганы, кээ бирлери белгилүү себептер менен барбай калганы, Строкова менен Момбеков эмнеге нааразы экенин бетине ачуу чындыкты айтканы эле партиянын ичинде абал жакшы эмес экенин билдирет. Атамбаевде кол тийбестик жана башка өзүнө керектүү жакшы шарттардын баары бар. Саясатчылар да өзүн ойлошот. Көздү жумуп алып, анын айткандарын аткара бербейт. Мыйзамдуу шайланган өлкө башчысы бар экенин түшүнөт, ага каршы чыгып, Атамбаевди колдоого барышпайт. Ошондуктан Атамбаев вакуумда калган абалы менен Жээнбековго каршы туруштук бере албайт. Өзүнүн партиясы колдобогондон абалы кыйын болот. Эл болсо такыр колдобойт да. Бетме-бет жолукканда кээ бир сөздөрүн айтып алышы мүмкүн, азыркыдай болуп публиканын алдына чыгып алып сүйлөй албайт. Жээнбековду оппозиция, эл, КСДП да колдоого алып жатат. Баары өзгөрүүнү каалап турат.

Маектешкендер: Бекен Назаралиев, Наралы Асанбаев

Булак: Жаңы ОРДО