ИИМдин Баңгизаттарды мыйзамсыз жүгүртүүгө каршы күрөшүү кызматы тарабынан Бишкек шаарынын аймагында башка кызматтар менен биргеликте "K" интернет-дүкөнү аркылуу синтетикалык баңгизаттарды таратуу менен алектенген эл аралык кылмыштуу топтун ишмердүүлүгүнө бөгөт коюу боюнча комплекстүү ыкчам-издөө иш-чаралар жүргүзүлдү. Бул тууралуу ИИМдин басма сөз кызматы билдирди.

Анда 2007-жылы туулган К.А.Б. жана 2005-жылы туулган С.С.А. аттуу жарандар "Honda Fit" үлгүсүндөгү авто унаа менен бара жаткан жеринен кармалган. Унааны тинтүү учурунда кутунун ичинде жалпы салмагы 1 кг жакын болгон кочкул жашыл түстөгү заты бар 4 брикет табылган.

Ыкчам тергөө иш-чараларынын жүрүшүндө К.А.Б.нын жашаган жери боюнча тинтүү жүргүзүлүп, төмөнкүлөр табылып алынды: жалпы салмагы 125,47 грамм болгон ар кандай түстөгү жана өлчөмдөгү 290 таблетка, жалпы салмагы 157,37 грамм болгон ZIP-пакеттердеги заттар, салмагы 194,31 грамм болгон кристалл сымал зат, "MBank" банктык картасы, электрондук тараза, ZIP-пакеттер, кол каптар, изолента, магниттер жана баңгизаттарды таңгактоо үчүн башка шаймандар.

Баңгизаттар жана психотроптук заттар Бишкек шаарынын жана Чүй облусунун аймагында жашыруун жайгаштыруу ыкмасы менен таратууга багытталгандыгы аныкталган.

Ошентип, 5 миңден ашык бир жолку дозадагы баңгизаттарды жана психотроптук заттарды 5 миллион сомдон ашык суммага таратууга бөгөт коюлду.

Бул факты боюнча Кыргыз Республикасынын Кылмыш-жаза кодексинин 282-беренеси боюнча кылмыш иши козголгон.

Соттук-химиялык экспертизалар дайындалып, кылмыштуу топтун бардык катышуучуларын жана баңгизаттарды жеткирүү каналдарын аныктоо боюнча ыкчам тергөө иш-чаралары жүргүзүлүүдө.