Ички иштер министрлигинин Баңги заттарды мыйзамсыз жүгүртүүгө каршы күрөшүү кызматынын кызматкерлери тарабынан Бишкек шаарынын аймагында "Макси" аттуу кызматтык-издөөчү иттин жардамы менен жүргүзүлгөн ыкчам иш-чараларынын натыйжасында 1995-жылы туулган А.у.М. аттуу жаран кармалган. Бул тууралуу ИИМдин Басма сөз кызматы билдирди.

Жеке кароо учурунда кармалган жарандан жалпы салмагы 28 грамм болгон психотроптук зат табылып алынган.

Ыкчам иш-чаралардын жүрүшүндө, шектүү жаран коңшу мамлекеттен жөнөтүлгөн эл аралык почта алганы аныкталган.

Жөнөтүлгөн кутучаны кароо учурунда, жашыруу үчүн колдонулган тиричилик мешинин ичинен жалпы салмагы 1 килограмм 33 грамм болгон психотроптук зат табылып алынган.

Кармалган жарандын жашаган жеринде жүргүзүлгөн тинтүү учурунда салмагы 6 грамм болгон баңгизаты табылып алынган.

Тергөө учурунда, шектүү "К" интернет дүкөнүндө иштеп, Бишкек шаарынын жана Чүй облусунун аймагында "тайник-закладка" деп аталган жашыруучу жайларды жасоо аркылуу психотроптук заттарды таркатып жүргөндүгү аныкталган.

Алдын ала эсептөөгө ылайык, алынган партия сатылып кеткен учурда мыйзамсыз киреше 5 миллион сомдон ашык сумманы түзмөк. Милиция кызматкерлеринин өз убагында көрүлгөн чараларынын натыйжасында Кыргыз Республикасынын аймагында 7 миңден ашык бир жолку дозадагы синтетикалык баңгизаттардын таралышына бөгөт коюлду.

Учурда бул кылмыштуу иштерге тиешеси бар башка адамдарды аныктоого багытталган кошумча ыкчам-тергөө иш-чаралары жүргүзүлүүдө.