Индиянын Гуджарат штатында Чандипур вирусунан келип чыккан курч энцефалит оорусу күч алууда. Бул тууралуу Times of India жазат.

Мамлекеттик саламаттыкты сактоо департаменти 21-июлда вирустун болжол менен 13 жаңы учуру катталганын жана 5 адам каза болгонун билдирди. Акыркы маалыматтарды эске алганда, инфекцияны жуктуруп алгандардын саны 84 адамга, каза болгондордун саны 32ге жетти.

2003-2004-жылдары Борбордук Индиядагы ушундай эле эпидемия учурунда өлүмдүн деңгээли 56-75% түзгөн.

Чандипур вирусу биринчи жолу 1965-жылы Махараштра штатынын Нагпур районунда аныкталган. Буга чейин Андхра-Прадеш, Махараштра, Одиша жана Гуджаратта бир нече эпидемия катталган.

Индиянын Педиатрия академиясынын жетекчиси доктор Васант Халаткар вирусту аныктоо кыйын экенин айтты. Оору менен көбүнчө 15 жашка чейинки балдар жабыркайт.

Вирус негизинен чиркейлер аркылуу жугат. Оору негизинен муссондук мезгилде жана чиркейлердин популяциясы туу чокусуна жеткенден кийин катталган.

Симптомдорго жогорку температура, баш оору жана конвульсия кирет. Бул симптомдор неврологиялык кыйынчылыктарга, комага, ал тургай өлүмгө чейин жеткириши мүмкүн.

Вирустан сактануу, биринчи кезекте, жугузуунун негизги жолу болгон чиркей чакканын алдын алуу болуп эсептелет.

Булак: NazarNews.kg