Бишкек шаарындагы «Нарын» рестораны – ордо калаанын чок ортосундагы совет доорунан калган маданий жайлардын бири. Акаев бийлигинен тарта анын айланасында көп жылдардан бери талаш-тартыш болуп келет. Бишкек мэриясы тарыхый маанисин жоготту деген шылтоо менен, маданий макамынан ажыратып, аны бузуу чечимине келишиптир. Мунун артында дагы кимдин кызыкчылыгы турат? Бул тууралуу депутат Ирина Карамушкина Жогорку Кеӊеш жыйынында билдирди.

«Чет өлкөлүк архитекторлор да, жергиликтүү адистер да жалпы наркы 5 млн долларга бааланган «Нарын» ресторанынын имаратын оӊдосо боло турганын айтууда. Тилекке каршы, ага жеке кызыкчылыгы бар тараптар кулак каккысы келбейт. Менимче, совет доорунан калган бул тарыхый жана маданий имаратты капиталдык оӊдоодон өткөрүп, Жаштар ордосуна айландыруу керек. Өкмөт бул маселени кылдат иликтеп чыгып, туура чечим кабыл алууга тийиш», - дейт депутат.

Булак: NazarNews.kg