COVID-19 менен күрөшүү боюнча республикалык штаб министрликтер менен ведомстволордун жетекчилерине кызматкерлердин кеминде 50%, анын ичинде 60 жаштан жогору кызматкерлер, өнөкөт оорулары барлар жана кош бойлуу аялдарды аралыктан иштөөгө өткөрүүнү сунуш кылды.

АКИpress кайсы министрликтер менен ведомстволор кызматкерлерин аралыктан иштөөгө жиберерин тактады:

Өзгөчө кырдаалдар министрлиги

Өзгөчө кырдаалдар министрлиги кызматкерлердин арасында коронавирус жуктургандар катталбагандыгын, ошондуктан алар кадимки режимде иштеп жатышканын билдирди.

«Азырынча эч ким аралыктан иштөөгө кеткен жок. Маселе эпидемиологиялык кырдаалга жараша бир жуманын ичинде сөзсүз чечилет», - деп билдиришти ӨКМден.

Саламаттыкты сактоо жана социалдык өнүгүү министрлиги

Саламаттыкты сактоо министрлиги аталган министрликтин кандай режимде иштей тургандыгы жөнүндө чечим жок экендигин билдирди. Маселе бүгүн чечилет.

Маданият, маалымат, спорт жана жаштар саясаты министрлиги

Министрликте оффлайн режимине өтүү маселеси талкуулана элек. Чечим жакынкы күндөрү кабыл алынат.

Юстиция министрлиги

Юстиция министрлиги жумушчулардын бир бөлүгүн аралыктан иштөөгө жөнөтүүнү пландап жатат. Алар ооругандардын санын тактайт. Азырынча расмий маалымат жок.

Ички иштер министрлиги

Ички иштер министрлигинин маалыматы боюнча эркин жалданма кызмат орундарында иштеген кызматкерлер мүмкүн болушунча аралыктан иштөөгө жөнөтүлүп, милиция кызматкерлери кадимки режимде иштеп жатат.

«Бизде маанилүү иштер бар: тергөө, камакка алуу, профилактикалык тейлөө, объектилердин коопсуздугу, коомдук жана жол коопсуздугун камсыз кылуу, күзөт, окуя болгон жерге жөнөө, кайгуул-күзөт. Ошондой эле туристтик сезон башталды. Милиция ар дайым тартипти сактайт», - деди ИИМдин басма сөз катчысы Бакыт Сейитов.

Ал министрлик өз кызматкерлеринин ден соолугуна кам көрөрүн билдирди: бирөө эс алууга кетет, башкалары милдеттүү медициналык кароодон өтүп, жеке коргонуу каражаттары менен камсыз болот.

Улуттук коопсуздук боюнча мамлекеттик комитет

Бүгүн Улуттук коопсуздук мамлекеттик комитети кадимки режимде иштеп жатат.

Жазаларды аткаруу боюнча мамлекеттик кызмат

Мамлекеттик жаза аткаруу кызматы кызматкерлер кадимки режимде иштеп жаткандыгын билдирди.

«Албетте, көзөмөл күчөтүлүп, алдын алуу иштери жүрүп жатат. Коронавирусту жуктуруп алган кызматкерлер үчүн ведомстволук ооруканада керебеттер даярдалган, №47 түзөтүү колониясында отургандар үчүн дагы орундар бар. Атайын контингентке туугандары менен жолугушууга же адвокаттар менен жолугушууга уруксат берилет, эгерде сырттан келген адамдын ПЧР тестинин натыйжасы терс болсо», - деп билдирди Жазаларды аткаруу мамлекеттик кызматы.

Мамлекеттик архитектура, курулуш жана турак жай-коммуналдык чарба агенттиги

Мамкурулуш айрым кызматкерлерин аралыктан иштөөгө жөнөтөт.

Биринчи кезекте, 60 жаштан жогорку, Борбордук аппаратта иштеген, өнөкөт оорулары бар кызматкерлер, 3 жашка чейинки балдары барлар аралыктан иштөө режимге жөнөтүлөт.

«Биз кызматкерлердин тизмесин аныктайбыз. Азырынча мөөнөт 15-июлга чейин белгиленди, бирок кийин кырдаалга жараша чечим кабыл алынат. Ошондой эле, штабдын сунуштары аткарылат — коомдук жайларга себепсиз барбоо, санитардык көзөмөлдү жүргүзүү. Вакцинация сунуштоо мүнөзүндө болот. Буга чейин вакцина алган кызматкерлер дагы бар», - деп билдиришти агенттик.

Мамкурулуш ошондой эле, учурда «Бирдиктүү терезе» өз ишин улантат деп түшүндүрдү. Бирок, «Бирдиктүү терезени» карантинге алуу маселеси каралып жатат.

«Эгерде кырдаал курчуп кетсе, Бишкектеги «Бирдиктүү терезени» карантинге алууга туура келиши мүмкүн. Мамкурулушта буга чейин оорулуу адамдар болгон: 6 адамдан коронавирус тастыкталды, 3 адам анализдин жыйынтыгын күтүп жатышат», - деп билдиришти ведомстводон.

Мамлекеттик финансылык чалгындоо кызматы

Финансылык чалгындоо документ министрлер кабинетинен келгенин билдирди. Учурда ал жетекчиликтин кароосунда.

«Кечке чейин, бөлүмдүн иштөө режими боюнча чечим бизге маалымат берилиши керек», - деп кошумчалады Финчалгындоо.

Улуттук энергетикалык холдинг

Улуттук энергетикалык холдингден кабарлашкандай, аларда санитардык чараларды так сактоо боюнча көрсөтмөлөр бар: маска кийип, санитайзерлерди колдонуу жана жумуш орундарын желдетип туруу.

Ишкана жетекчилик жакынкы аралыкта кызматкерлерди аралыктан иштөөгө жөнөтүү жөнүндө чечим кабыл аларын билдирди.

Экономика жана финансы министрлиги

Экономика жана каржы министрлигинде эпидемиологиялык кырдаалга байланыштуу маска режими, аралык сакталып, кызматкерлердин температурасы өлчөнөт.

«Кызматкерлерди аралыктан иштөө режимине өткөрүү маселеси чечиле элек, белгилүү болгондон кийин маалымдайбыз», - деп билдиришти министрликтен.

Инвестицияларды илгерилетүү жана коргоо министрлиги

Министрликтин айтымында, азырынча министрлик дистанциялык режимге өтө элек, анткени анда 25 гана кызматкер иштейт.

«Регламентке ылайык, кызматкерлердин 50% дистанциялык режимге өтүшү керек. Бирок алардын жарымы аралыктан иштөөгө өтсө, анда биздин иш токтоп калат, андыктан алыстан иштөөгө өтпөө чечими кабыл алынды», - деп түшүндүрүштү министрликтен.

Ошондой эле аталган министрлик кабыл алуу онлайн режиминде иштеп жаткандыгын билдирди. «Биз коноктор менен байланышпайбыз. Маска режимин, аралыкта сактап, бардык санитардык-эпидемиологиялык чараларды колдонуп жатабыз», - деп кошумчалады министрлик.

Энергетика жана өнөр-жай министрлиги

Министрлик коронавирус абалынын начарлашына жол бербөө боюнча буйрук даярдап, сунуш кылынган адамдарды аралыктан иштөөгө жөнөтүп жаткандыгын, ошондой эле мекемелерди санитардык тазалоо жана башка иш-чараларды жүргүзүп жаткандыгын билдирди.

Булак: NazarNews.kg