Кыргыз Республикасынын Жогорку Кеңешинин Төрагасы Канатбек Исаев дипломатиялык кызматкерлерди кесиптик күнү менен куттуктады. бул тууралуу Жогорку Кеңештин Басма сэз кызматы билдирди.

Жогорку Кеңешинин Төрагасы Канатбек Исаевдин куттуктоо сөзү:

Урматтуу дипломатиялык кызматтын ардагерлери жана кызматкерлери!

Сиздерди Кыргыз Республикасынын Жогорку Кеңешинин жана жеке өзүмдүн атымдан дипломатия кызматкерлеринин күнү менен чын дилимден куттуктайм!

"Акын менен элчиге өлүм жок" - деген кыргыз калкы байыртан улуттар аралык достукту, элдердин ортосундагы тыгыз байланышты камсыздаган элчилерге жогору баасын берип, аларды ар убак аздектеп, сыйлашкан. Анткени, элчилик милдетти ар бир адам эле аркалай алган эмес. Сөзгө чечен, билими терең, акылы тунук, адамзатка таандык асыл сапаттарга ээ инсан гана өкүлчүлүк кызматты өтө берилгендик менен аткарып, жоолошкон элди достоштуруп, дос элди бир тууганга айланткан. Азыркы ааламдашкан доордо да элчилерибиздин мааниси зор. Эгемен өлкөбүздүн тышкы алакасын арттырып, эл аралык деңгээлдеги байланыштарыбызды чыңдоодо дипломатиялык кызматкерлердин ролу жогору.  

Андыктан, мындан ары да ишке толук кандуу берилүү менен, алдыңыздарда турган милдеттерди өз убагында сапаттуу чечүүгө жана Кыргыз Республикасынын улуттук кызыкчылыктарын коргоого болгон күч - аракетиңиздерди жумшай берериңиздерге терең ишенем. Бар болуңуздар! Сиздерге бекем ден - соолук, кажыбас кайрат тилейм!

Урматтоо менен, Кыргыз Республикасынын Жогорку Кеңешинин Төрагасы Канатбек Исаев.

Булак: NazarNews.kg