Каспий деңизиндеги суунун деңгээли акыркы жылдары кескин төмөндөп, аймактагы экологиялык абал олуттуу тынчсызданууну жаратууда. Бул көйгөйдү чечүү үчүн Бириккен Улуттар Уюмунун Өнүктүрүү программасы (UNDP) жана Япония өкмөтү Казакстанда 3 миллион долларлык жаңы долбоорду ишке киргизди.  Бул тууралуу маалыматты InBusiness.kz жазып чыкты.

Долбоор Каспий аймагындагы суу ресурстарын натыйжалуу башкарууга, климаттык өзгөрүүлөрдүн кесепеттерин азайтууга жана уникалдуу экосистеманы сактоого багытталган.

Адистердин айтымында, суунун азайышына негизги себеп — глобалдык жылуулук жана дарыялар аркылуу келген суунун көлөмүн кыскарышы. Өзгөчө Волга дарыясынын агымынын азайышы деңиз деңгээлине түздөн-түз таасир берип жатат. Каспийге келген суунун 80%ы ушул дарыядан келет.

Экологдор эскерткендей, эгер азыртан чара көрүлбөсө, аймактагы биологиялык ар түрдүүлүккө, балык чарбасына жана жээк инфраструктурасына чоң зыян келет. Айрыкча бекер балыгы сыяктуу сейрек кездешүүчү түрлөрдүн саны кескин азайып бара жаткандыгы айтылууда.

Долбоордун алкагында Каспий бассейнине заманбап мониторинг системалары киргизилет. Ошондой эле суу ресурстарын башкаруу боюнча жаңы технологиялар колдонулуп, жергиликтүү адистер окутулат. Негизги максат — экологиялык тобокелдиктерди алдын ала аныктап, алдын алуу.

Каспий деңизи Европа менен Азиянын ортосунда жайгашкан дүйнөдөгү эң чоң жабык көл. Аянты 371 миң чарчы чакырымды түзөт. Узундугу 1200 км, эң кең жери 435 кмге жетет.  

Каспий Казакстан, Россия, Азербайжан, Түркменстан жана Ирандын жээгин жууп өтөт. Ал мунай, газ жана балык ресурстары боюнча дүйнөдөгү эң маанилүү аймактардын бири болуп эсептелет.