Мурдагы президент Алмазбек Атамбаевдин психологиялык көйгөйлөрү бар экени боюнча буга чейин АКШнын экс-элчисинен баштап, жөнөкөй жарандарга чейин айтылып келген. Бул ирет Кыргызстандагы белгилүү дарыгерлердин бири Мамбет Мамакеевге таянып, социалдык тармактагы баракча жазып чыкты. Дарыгердин сөзү төмөндө өзгөртүүсүз берилди: 

"Мен республикада бирден-бир 92 жаштагы аксакал катары өз оюмду айтайын. Мен Сооронбай экөөнү көп жылдардан бери билем. Алмаз Атамбаевден баштайын. Алмазды чогуу депутат болгондон тартып, көп жылдардан бери билем. Экөөбүз сен-мен деп көрүшкөн эмеспиз. Бири-бирибизге мамилебиз түзүк эле. Мени Мамбет ава деп, мен Алмазчик деген сөздөн башка сөз жок эле.

Бирок, ошондо анын активдүү депутат катары бир адамга жакшы сөз айтканын уккан жокмун. Ар дайым бирөө менен кармашып жүргөнү-жүргөн. Менин байкашымда кээ бир адамдарда болот: туулгандан өлгөнгө чейин бирөөгө жакшылык ойлобогон, ар дайым издегени жаманчылык, мунсуз жашай албайт. Көнгөн адам бул кесибин таштап койсо, анда ооруп калат. Мындай адамдардын көбүн билем. Ошентип, дайыма кармашып жүрүп, өзүнө ылайык шайкаларды түзүп, эки төңкөрүш жасады.
Төңкөрүштүн бирден-бир жетекчиси Алмаз болду. Ошон үчүн азыр мактанып жүрбөйбү: "Эки революцияда эки президентти куудум", - деп. Кайдагы революция? Революция деп жөнөкөй эл жүрдү. Тигилердин максаты болсо - бийликти басып алуу.

Менин эсимден кетпейт. 2010-жылдын 7-апрелинде бизге Улуттук хирургия борборуна 70 атылган баланы алып келишкен. Myну пендеге бербесин. Мындай трагедияны врач болуп туруп көргөн жок элем. Бир заматта оорукананын короосуна, коридорго атылган балдардын денеси, кызыл жайылган кан, ичегиси чубалжыган, туугандарынын ызы-чуусу, кыйкырык, өкүрүк толтура автоунаа...

Ошолорду карап туруп, өзүм башында туруп, 8 операциялык столубузда бүт хирургдарыбыз, медайымдарыбыз, бирөө да кетпей, күн-түн дебей турдук, тынымсыз операция жасадык. Төрт баланын өлүгүн алып келишти. Дагы жүрөккө ок тийген экөө операциялык столдо калды. Өтө көп жарадар болгондуктан, 64 баланын өмүрүн сактап калдык. Эртеси саат 10дон кийин Роза Отунбаева, Темир Сариев келишти. Ошондо күнүгө ок жеген балдарды карап жүрдүм. Обход кылып жүрүп сурасам, көпчүлүгү эч жерде иштебегендер. Менин деле кээде, кези келгенде, сага окшоп тике айтып салам. “Ой бала, ал жакка эмнеге бардың? Эмне издеп бардың? Барып көргөнүң мына, ок жеп, кыйналып жатасың”, - деп сурасам: “Агай, жаңылдым, алдандым, ок атыларын билбей эле бардым эле”, - дейт.

Мындан башка канча мародерлук болуп, талкаланып, уурдап-тонолуп, мамлекетке чоң зыян келтирилди. Эми ушуну эстүү-баштуу кишилер ойлонуп, ушунун баарына ким күнөөлүү, деген суроо келип чыгат. Ошол убакыттагы төңкөрүш жасаган, балдарды козутуп коюп, эмне болсо ошол болсун деп ээн таштап койгон Аламзбек Атамбаев баш болуп, күнөөлүү. Бул өлгөн балдардын ата-энесине, тирүү калгандарына канчалык убал болду. Мародерлор жасаган зыяндарга, Ак үйдүн эле ремонтуна миллиондогон мамлекеттин, элдин акчасы кетти. Менимче, ушул кеткен чыгымдар уюштурган адамдардын чөнтөгүнөн каржыланса туура болмок. Эми менин таң калганым, ошол төңкөрүштү ишке ашырган жөнөкөй эл эч нерсеси жок калып, уюштургандар, алардын желдеттери анын пайдасын көрүүдө.
Ошончо адамдын өмүрүн сактап калган дарыгерлерге, хирургдарга рахмат деп койгонго жарашкан жок. Эми Атамбаевдин мөөнөтү бүтүп, Сооронбай Жээнбековго президенттикти берди. Көргөн эл ыраазы эле болуп турдук. Ушунчалык мактап, жалгыз ишенген, президентке жарай турган накта кесиптешим деп, шайлоодо чоң жардам кылган, муну унутуп коюуга болбойт.

Сооронбай Жээнбековдун инаугурация убагында мен да катышып калдым. Жусуп Жээнбеков экөөбүз катар отуруп калыптырбыз. Ошондо да элди таң калтырды го. Бири-бирин өбүшүп, кучакташып, чын досум,-деп. Бири-бирине укмуш каалоолорду айтып, Алмаз улам-улам суу ичип турду. Мен Жусупка доктурлук көз менен байкап туруп:

- Бул Алмаз тез-тез суу ичкенине караганда, кечээ катуу кетсе керек, бул адамдын чын пейили менен зыпылдап жатышына мен ишенбей турам,-дедим. Ошону менен бүттү. Атамбаев өзгөргөн экен бул жолу өзү макулдугу менен өткөзүп берди деп ойлоп калдык. Буюрса, оңолот экенбиз, элибизде тынччылык, бири-бирин урматтаган жакшы заман келет экен деп ойлоп калдык.
Анан эмне болду? 2-3 ай өтпөй буларды Кудай урду, чатакташа баштаптыр деп уга баштадык. Анан чатактары ачыкка чыгып, чындык болуп чыга баштады. Көрсө, Алмазбек Атамбаев Сооронбай Жээнбековду президент кылам деп жаңылып калыптыр. Өзү сүйлөбөдүбү “Мен бул адамды жанымда 25 жылдан бери алып жүрүп, мындай акмакты билбепмин,” - деп.

Эми Сооронбайды ушунчалык шылдыңдап, жамандап, ачык эле телевизордон акмагын чыгарып жатат. Менимче, азыр түшүнүп жатат. “Мындай «немени» президент кылып алсам, анан өзүм жатып алып, мурункудай бийлик жүргүзүп, өзүм башкара берем,” - деп ойлосо керек. Бул жерден Алмаз чоң жаңылды, Сооронбай акылдуулук кылып, мунун айтканына макул болбой койду. Себеби, Сооронбайдын дагы өзүнүн башы, өзүнүн идеясы бар, иш билгендиги жагынан бүт этаптарды басып келип, Алмаздан бардык жагынан жогору болуп чыкты. Муну бүт эл көзү менен көрүп жатат.
Менин оюмча, дарыгер катары байкоомдо, Алмазбек Атамбаев - оорулуу адам. Мен 2010-жылы Р.оза Отунбаева президент болуп турганда "Бул адам нейропсихически оорулуу болушу мүмкүн, байкаңыз” деп айттым эле, жазып дагы бердим эле.
Роза Отунбаева кыңк эткен эмес. 2016-жылы борбордук аянтта Атамбаев Отунбаеваны легитимсиз президент болгон деп, шылдың кылган, аягында кууп чыккан. Мен кийин Розага кезигип, Атамбаев ырас кылды сени дедим",-дейт  хирург, медицина илимдеринин доктору, профессор, Кыргызстан УИАнын академиги, Кыргыз Республикасынын илимге эмгек сиңирген ишмери наамдарынын ээси Мамбет Мамакеев.

 Булак: NazarNews.kg