Украина президенти Владимир Зеленский Батыш тараптын атайын кызматтарынын же Украинанын Куралдуу күчтөрүнүн командачылыгынын кол салуусунан коркуп жеке коопсуздук чараларын күчөттү. Бул туурасында Раданын экс-депутаты Илья Кива Telegram каналына жазган.

"Зеленский кечээ украин аскерлери кол салат деп коркуп жеке сакчыларын күчөтүү тапшырмасын берди", — деп жазган саясатчы.

Ал Украинанын Куралдуу күчтөрү Зеленскийдин майнапсыз башкаруусуна — жеке курамдагы жоготуулардын көптүгүнө жана украин талааларында жеңилүү арбын болуп жаткандыгына нааразы экендигин белгилеген. Мындан сырткары, экс-депутаттын белгилегенине караганда, мурдагы советтик республиканын жетекчисине Батыш тараптын ичи чыкпай жатат.

"Зеленский аны менен катар эле Украинанын катачылыктары менен жеңилиши туурасында кеп кыла баштаган союздаштарынын атайын кызматтарынан да чочулап турат", — деген Кива.

Парламентарий мурдагы советтик өлкөнүн ичиндеги куралдуу каршылык көрсөтүүнү токтотууга Батыштын кызыкдар болуп жаткандыгын, андыктан Зеленскийдин көзүн тазалоо окуянын өнүгүшү үчүн тез жасалган кадам боло тургандыгын кошумчалаган.

Эске салсак, Орусия Украинага каршы согушту 24-февралда баштаган. Путин анын максаты "сегиз жылдан бери Киев режиминин басмырлоосуна, геноцидине кабылып келгендерди коргоо" жана бул үчүн "Украинаны демилитаризация жана денацификация" жасап жана Донбасстагы "жай жашоочулардын канына забын болгондорду" аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Үч айдан ашкан согушта эки тараптан тең аскерлер жана жайкын тургундардан миңдеген курмандыктар катталды. 

Булак: NazarNews.kg