Бүгүнкү күнгө чейин коронавирус инфекциясы менен ооругандар расмий катталбаган Түркмөнстандын президенти Гурбангулы Бердымухамедов бет кап тагынды. Анын себеби - чаңдан коргонуу. Бул тууралуу чет элдик басылмалар жазып чыгышты.

Маалыматка ылайык, ушул аптада президент Гурбангулы Бердымухамедов балык уулоого чыгып, биринчи жолу маска кийген. Президент өзүн "вирустун чаңынан" коргоо үчүн бет кап кийген. Балык уулоодон кийин президент балдар үйүнө барып, балыкты аталган жайдын тарбиялануучуларына берген. Анда балдар дагы маска кийип жүрүшкөн. Түркмөнстанда бет кап кийүү жана социалдык аралыкты сактоо эрежелери узап бараткан аптада күчүнө кирип, ресторандар, кафелер жана базарлар жабылсын деген тапшырма коюлган.

Түркмөнстан алдын алуу чараларын көргөндүктөн коронавирус инфекциясы менен ооругандар жок деп ырастап келет.

Булак: NazarNews.kg