Россиянын президенти Владимир Путиндин Астанага болгон сапарынын алкагында «Росатом» мамлекеттик корпорациясынын башкы директору Алексей Лихачев менен Казакстандын Атомдук энергетика агенттигинин төрагасы Алмасадам Саткалиев өлкөдөгү биринчи атомдук электр станциясын (АЭС) куруу долбоору боюнча кызматташуу келишимине кол коюшканын «КоммерсантЪ» маалымдады.

Документте курулушту каржылоо үчүн Казакстанга экспорттук насыя берүү пункту каралган. Лихачев белгилегендей, Россия АЭСтин пайдубалын ушул он жылдыктын ичинде куюп бүтүүгө аракет кылат.

Казакстандын президенти Касым-Жомарт Токаев Путинге «илимий-билим берүү жана технологиялык өз ара аракеттенүүнүн локомотиви боло турган бул ири долбоорду» жеке колдогону үчүн ыраазычылык билдирди.

«Станцияны эксплуатацияга берүү казак экономикасын энергия менен камсыздоого олуттуу салым кошуп, ишканаларды жана үй чарбаларын арзан жана таза энергия менен жабдууга жардам берет... Казакстандын президенти менен макулдашканыбыздай, кеп жөн гана атомдук электр станциясын куруу жөнүндө эмес... Бул жерде бүтүндөй бир тармакты түзүү тууралуу сөз болуп жатат», - деди Путин.

Казакстан бир нече АЭС курууну пландап жатат. «Росатом» менен биргеликте алгачкысын куруу болжол менен 11 жылга созулуп, 2035-2036-жылдары бүтүшү мүмкүн. Балхаш көлүндөгү Үлкөн айылынын жанында изилдөө иштери былтыр август айында башталган. Биринчи АЭС «Балхаш» деп аталып, Россия каражаттын 85%ын насыя түрүндө берет, ал эми калган 15%ын өлкө өкмөтү инвестициялайт. Балхаштагы экинчи АЭСтин жумушчу аталышы — «Мойынкум», бул долбоор боюнча кытайлык CNPC компаниясы артыкчылыктуу өнөктөш катары каралууда.