Бишкек — Кыргызстан Бириккен Улуттар Уюмунун Азык-түлүк жана айыл чарба уюмунун (ФАО) «Топурак доктору» аттуу глобалдык программасына кошулду. Бул программа топурак ресурстарын туруктуу башкарууга жана алардын түшүмдүүлүгүн жогорулатууга багытталган.

Топурак – дүйнөлүк азык-түлүк өндүрүшүнүн 95% чейин камсыз кылган эң маанилүү жаратылыш ресурстарынын бири. Кыргызстан шартында, тоолуу рельеф жана ар түрдүү агроландшафттар басымдуулук кылгандыктан, топурактын түшүмдүүлүгүн сактоо маселеси өзгөчө мааниге ээ. Өлкөдө эрозия, жерлердин деградациясы жана топурактын туздануусу сыяктуу көйгөйлөр бар, бул айыл чарбасынын туруктуулугуна түздөн-түз таасирин тийгизет.

Программаны ишке ашыруунун алкагында ФАО К.К. Азыков атындагы Кыргыз дыйканчылык илимий-изилдөө институту (КДИИИ) менен биргеликте улуттук деңгээлдеги иш-чараларды баштады. Демилге фермерлердин, агрономдордун жана айыл чарба адистеринин практикалык көндүмдөрүн өнүктүрүүгө, топуракты башкаруунун туруктуу ыкмаларын киргизүүгө багытталган.

23–27-март күндөрү Бишкекте программанын алкагындагы биринчи окутуу тренинги өтүүдө. Ага КДИИИнин адистери, агрономдор, консультанттар жана фермерлер катышууда. Окутуу программасы теориялык билимдерди жана практикалык иштерди камтыйт, анын ичинде топурактын абалын аныктоо, түзүмүн баалоо, кычкылдуулук деңгээлин жана органикалык заттын көлөмүн аныктоо ыкмалары каралган.

«Топурак доктору» глобалдык программасы ФАО тарабынан 2020-жылы башталган жана «фермерден – фермерге» принципине негизделген. Ал топурактын деградациясын алдын алууга жана туруктуу айыл чарба практикаларын жайылтууга багытталган.

Программанын Кыргызстанда ишке ашырылышы топурак ресурстарын натыйжалуу пайдаланууга, айыл чарба продукциясынын сапатын жакшыртууга жана агрардык сектордун узак мөөнөттүү туруктуулугун бекемдөөгө өбөлгө түзөрү күтүлүүдө.