14-декабрдан тартып кыргызстандыктар Кепилдик фондунан колдоо катары мамлекеттик ипотеканын программаларынын бири боюнча турак жай сатып алууда баштапкы төлөмдүн суммасынын 10%га чейинки көлөмүн ала алышат. Бул тууралуу “Кабар” агенттигинде өткөн маалымат жыйынында “Кепилдик фонду” ААК башкармалыгынын төрагасы Малик-Айдар Абакиров билдирди.

Анын айтымында, Кепилдик фонду, Мамлекеттик ипотекалык компания жана “РСК” банк тиешелүү келишимге кол коюшту.

“Ипотекалык насыя боюнча кепилдик Кыргызстандын финансы-банктык тутумунда биринчи жолу жайылтылууда. Бул инструмент жарандарга ипотекалык насыя алууга шарт түзөт жана алгачкы төлөм жетишсиз болгон учурда Кепилдик фонду алгачкы төлөмгө кепил боло алат”, - деди ал.

Ал белгилегендей, бул жаңы шарт аймактардан турак жай сатып алууда гана жеткиликтүү болот. Бишкек жана Ош шаарынан турак жай сатып алууну көздөгөндөр үчүн бул жаңы инструментти колдоно алышпайт.

Ошондой эле бул жаңы шарт KfW (Kreditanstalt für Wiederaufbau) немец мамлекеттик банкы колдоого алган программаларга гана тиешелүү. Ага төмөнкү программалар кирет:

• “КРнын аймактарынан жаңы турак жай алуу” – аймактарда жаңы турак жай сатып алуу үчүн ипотека 8% менен 15 жылга чейин берилет, ал эми алгачкы төлөм алынып жаткан турак жайдын жалпы баасынын 20%ын түзөт;

• “Кыргызстандын аймактарында реконструкциялоо менен экинчи кезектеги турак жайларды алуу”. Бул программанын шарттары окшош.

“Башкача айтканда, бул мамлекеттик ипотекалык программанын катышуучусу сатып алган турак жайдын наркынын кеминде 10%ына ээ болушу керек жана ал Кепилдик фондунан баштапкы төлөмдүн калган бөлүгүн талап кыла алат.

Биз KfW банкы менен алардын биздеги 14,9 млн евросун кайрадан ипотекага багыттайт, ошондон кийин гана биз ипотекалык программаларга кепилдик берүүнү макулдаштык”, - деди Абакиров.

Ал кошумчалагандай, кепилдик берүү өтүнүчүн кароо процедурасы банктагы ипотекалык насыяга арызды кароо процесси менен автоматташтырылган. Эгерде банк кредитти жана гарантиялык фондду кепилдикти берүүгө макулдук берсе, мамлекеттик ипотекалык программанын катышуучусу баштапкы төлөм менен бирге алынган кепилдиктин суммасынын дагы 2%ын бир жолу төлөйт.

"РСК Банк" ААК башкармалыгынын төрагасы Кадырбек Букуевдин айтымында, жаңы кепилдик продукт бүгүн "РСК Банктын" бардык филиалдарында жеткиликтүү. Алардын саны өлкө боюнча 54.

Булак: NazarNews.kg