Бүгүн, 2025-жылдын 3-апрелинде, Кыргыз Республикасынын Коргоо министрлигинин Борбордук аппаратынын жыйын залында Кыргыз Республикасынын коргоо министри, генерал-лейтенант Бактыбек Бекболотов «Жеңиш 9/45» кыймылынын уюштуруу комитетинин делегациясы менен жолугушту.

Бул кыймыл Улуу Ата Мекендик согуштагы 1941–1945-жылдардагы Жеңиштин 80 жылдыгын майрамдоого даярдык көрүү үчүн түзүлгөн. Делегациянын башында «Жеңиш 9/45» патриоттук кыймылынын уюштуруу комитетинин төрагасы, Россия Федерациясынын Федералдык Жыйынынын Мамлекеттик Думасынын төрагасынын орун басары Борис Чернышов болду.

Жолугушууга Бишкек шаарынын вице-мэри Виктория Мозгачева жана Кыргыз Республикасынын Маданият, маалымат жана жаштар саясаты министрлигинин өкүлдөрү да катышты.

«Биз Кыргыз Республикасынын Коргоо министрлигине ачык диалог үчүн жана “Жеңиш 9/45” эл аралык кыймылынын иш-чараларын уюштурууга көмөктөшкөнү үчүн ыраазычылык билдиребиз. Кыргыз кесиптештерибиз менен кызматташуубуз өзгөчө мааниге ээ, анткени биздин элдерибиздин ата-бабаларынын эрдиги тууралуу жалпы эс тутумубуз бар. Бул жолугушуу тарыхый адилеттикти чыңдоого дагы бир кадам болот деп ишенем. Кийинки жемиштүү кызматташтыгыбызга үмүт артабыз», — деди Борис Чернышов.«Жеңиш 9/45» долбоору «Евразия» автономдуу коммерциялык эмес уюму тарабынан демилгеленген. Кыргызстан бул кыймылга кошулуу чечимин кабыл алган. 2025-жылдын 27-февралында «Жеңиш 9/45» иш-чарасына даярдык көрүү алкагында өлкөдө биринчи уюштуруу комитетинин жыйыны өткөрүлгөн.
Жолугушуу учурунда Улуу Жеңишке арналган майрамдык иш-чараларды өткөрүүгө байланыштуу бардык маселелер каралып, дээрлик чечилди. Ошондой эле, Кыргыз Республикасынын министрликтери жана башка мамлекеттик органдары менен «Жеңиш 9/45» кыймылынын уюштуруу комитетинин ортосундагы мындан аркы кызматташтык маселелери талкууланды.

Кыргыз Республикасынын коргоо министри, генерал-лейтенант Б. Бекболотов Улуу Жеңиштин маанилүүлүгүн белгилеп: «... бул биздин жалпы Жеңиш, мурунку жалпы Ата Мекенибиздин бардык элдеринин өкүлдөрү Улуу Ата Мекендик согуштун бардык фронтторунда жана тылда эр жүрөктүүлүк, кайраттуулук жана жогорку патриоттуулук көрсөтүшкөн. Биздин милдет – алардын эрдиктерин эстеп гана тим болбостон, аны азыркы жаш муундарга жеткирүү, аларды чыныгы мекенчилдер кылып тарбиялоо. Азыр биз бардык иш-чараларды жогорку деңгээлде өткөрүп, Улуу Жеңиштин 80 жылдыгын татыктуу белгилешибиз керек…» - деди.

Жолугушуунун жыйынтыгында 4-апрелде Кыргыз Республикасынын Коргоо министрлигинин базасында тиешелүү министрликтер жана мекемелер менен биргеликте пресс-конференция өткөрүү чечими кабыл алынды.