Кыргызстандын тоолуу райондорунда кар көчкү түшүүсү күтүлөт. Бул тууралуу Өзгөчө кырдаалдар министрлигинин басма сөз кызматы билдирет.

Маалыматка ылайык, 2022-жылдын 6-декабрынан 8-декабрына чейин жаап жана күтүлүп жаткан карга байланыштуу Кыргызстандын тоолуу райондорунда жана Ала-Бука — Каныш-Кыя автоунаа жолунун 68-75-чакырымдарындагы Чапчыма ашуусуна кар көчкү түшүүcү жана кар күрткүсү күтүлүп, жолдор тайгак болуп, муз тоңот.

Белгилей кетсек, Кыргызгидромет агенттиги декабрь айында абанын айлык орточо температурасы жана жаан-чачындын айлык көлөмү нормага жакын болушу мүмкүн экенин билдирген.

Абанын айлык орточо температурасы климаттык норманын чегинде болуп, -1…-3 градус, тоо этектеринде жана Кемин өрөөнүндө -4…-6 градус суук болушу ыктымал. Ай ичинде абанын температурасы түнкүсүн +3 ...-2 — 4…-9 градуска чейин төмөндөсө, күндүз -2...+3 — 9…14 градуска чейин өзгөрүлүп турат. Кээ бир күндөрү абанын температурасы түнкүсүн -10…-15 градуска чейин муздайт. Жаан-чачындын айлык көлөмү нормага жакын болушу ыктымал.

Булак: NazaNews.kg