Кызыл-Кыяда адам өлтүрүүгө шектелген жаран кармалды. Бул тууралуу Баткен ОИИБинин басма сөз кызматынан билдиришти. 

Маалыматка ылайык, 5-июлда саат 20:20 чамасында, Кызыл-Кыя ШИИБинин нөөмөт бөлүмүнүн "102" кызматына Кызыл-Кыя шаарынын Асаналиев көчөсүндө жайгашкан Таштемир-Ажы базарында белгисиз жарандын жансыз денеси жаткандыгы боюнча кабар келип түшкөн.

Бул маалымат Кызыл-Кыя ШИИБинин кылмыштардын бирдиктүү реестрине катталып, тергөөгө чейинки текшерүү иштери башталган.

Окуя болгон жерге Кызыл-Кыя ШИИБинин ыкчам тергөө тобу менен барып, окуя болгон жерге кароо жүргүзгөн учурда каза болгон жаран Ноокат районунун 42 жаштагы тургуну С.Р. экендиги аныкталган. Ошондой эле окуя болгон жер Таштемир-Ажы базарынын күн чыгыш тарабындагы Сухой-Сай тилкесинде, тагыраагы маркумдун жансыз денесинин жаткан жери эч ким жашабаган кароосуз калган бөлмөнүн ичинде катталып, денесинде жаракат бар экендиги аныкталган. 

Аталган факты боюнча соттук-медицияналык экспертизалар дайындалып, Кылмыш-жаза кодексинин 122-беренесинин (Адам өлтүрүү) негизинде кылмыш иши козголгон.

Ошол эле күнү Кызыл-Кыя ШИИБинин ыкчам кызматкерлери тарабынан кылмышка шектүү катары мурда сот жообуна тартылган Кадамжай районунун Исхак-Полотхан айыл аймагынын тургуну 49 жаштагы Т.Т. Кызыл-Кыя шаарынан кармалды.

Учурда кылмышка шектүү жаран убактылуу кармоо жайына киргизилип, тергөө иштери уланууда.

Булак: NazarNews.kg