Кызыл-Кыяда адамды сүзүп кеткен айдоочу кылмыштын изи сууй электе видеокамералардын жардамы менен кармалды. Бул тууралуу Баткен ОИИБдин басма сөз кызматы билдирди.

Маалыматка ылайык, 15-январь күнү саат 01:20 чамасында Кызыл-Кыя ШИИБне шаардын Кулатов көчөсүндөгү, «Алтын-Ордо» ресторанынын бет маңдайында «Фольксваген-Пассат» үлгүсүндөгү автоунаа жөө жүргүнчүнү сүзүп кетип, айдоочу окуя болгон жерге автоунаасын таштап, изин жашырып качып кеткендиги боюнча маалымат келип түшкөн. 

Аталган маалымат 2026-жылдын 15-январь күнү Кызыл-Кыя ШИИБдин маалыматтардын электрондук журналына катталып, текшерүү иштери башталган. Кызыл-Кыя ШИИБдин ыкчам-тергөө тобу окуя болгон жерге барып, кароо жүргүзгөн.

Текшерүү учурунда Кызыл-Кыя шаарынан өткөн Ош–Раззаков унаа жолунун 83-чакырымында, чыгыштан батышты көздөй бара жаткан күмүш түстөгү «Фольксваген-Пассат» үлгүсүндөгү автоунаа Кызыл-Кыя шаарынын 74 жаштагы тургунун сүзүп кеткендиги аныкталган. Алган жаракаттарынан улам жабырлануучу окуя болгон жерде каза болгон.

Кызыл-Кыя ШИИБдин кызматкерлери тарабынан жүргүзүлгөн ыкчам-иликтөө иштеринин натыйжасында автоунаанын ээси аныкталып, шаар аймагына орнотулган видеокөзөмөл камераларынын жардамы менен Кадамжай районунун Үч-Коргон айыл аймагынын 1992-жылы туулган Ж.Б. аттуу тургуну кылмыштын изи сууй электе кармалып, Тергөө кызматына өткөрүлүп берилди.

Учурда бул факты боюнча тергөө амалдары жүргүзүлүүдө.