Кыргызстандын жергиликтүү авиакомпанияларын Европа биримдигинин кара тизмесинен чыгаруу үчүн кандай процедуралардан өтүшү керектигин Жарандык авиация агенттигинин директору Сталбек Шаршеев айтып берди. Ал мындай маалымат менен Sputnik маалымат борборунда өткөн "КРдеги авиация: рейстерди ишке киргизүү, №1 борт жана ЕБнын кара тизмеси" аттуу онлайн-брифингге катышуу учурунда бөлүштү. 

Сталбек Шаршеевдин айтымына караганда, кыргыз тарап документтердин биринчи пакетин жиберген, экинчиси кечээ жакында эле талкууланган. Анткен менен эзелки маселени чечүү мөөнөтү тууралуу сөз кылуу эртелик кылат. 

"Европанын авиациялык коопсуздук агенттигинин өкүлдөрү менен болгон видеоконференцияда бизге документтердин жаңыланган тизмесин жөнөтүшөрүн айтышты. Аларды биз даярдап беришибиз керек. Сөз биздин эл аралык нормалар менен иштеп жатканыбызды далилдөөчү база тууралуу болуп жатат. Кийин биздин тарап аны изилдөөгө жөнөтөт, баа берүү үчүн эксперттерге дагы убакыт керек. Андан соң аудитордук топ Кыргызстанга учуп келип жеринде текшерүү жүргүзүп, анын жыйынтыгы менен акыркы отчётун жазып, ЕБге бериши керек", — деди Шаршеев. 

Ал ошондой эле аталган документтер каралгандан кийин гана чечим чыгарын кошумчалады. Шаршеевдин пикиринде, пандемиядан улам өлкө качан экинчи этапка өтөрүн (эксперттердин келишин) айтуу кыйын.

Эске салсак, кара тизмеге коопсуздук көйгөйлөрүн чечпеген авиакомпаниялар кирет. Бул тизмеге кирген учурда учактар үчүн Европа биримдигинин аба каттамдары жабылат.

Кыргызстандын бардык авиакомпаниялары 2006-жылдан бери Европа биримдигинин кара тизмесинде. Андан чыгыш үчүн эл аралык стандарттарга жооп берүү зарыл. 

Булак: NazarNews.kg