Кытайда коронавирус жуктуруп алгандардын 70% айыгып, үйлөрүнө чыгарылды. Бул тууралуу РИА Новости Дүйнөлүк саламаттыкты сактоо уюмунун башчысы Тедрос Адхан Гейрейесуска таянып жазып чыкты.

Маалыматка караганда, Кытайда жаңы коронавирустун тиби менен ооруган 81миң кишинин, 70 пайызы айыгып үйлөрүнө чыгарылган. Ал эми статистика боюнча оорудан каза болгондордун 20 пайызы 80 жаштан өткөн адамдар болсо, жүрөк-кан тамырларынан жабыркагандар 13%, диабет менен ооругандар 9%, дем алуу органдарынан жабыркагандар 8%, рак оорусу менен жабыркагандар 7,5% түзгөн.

Белгилей кетсек, акыркы маалыматтар боюнча, жалпы дүйнө жүзүндө коронавирустан 4004 адам өлдү. Жуктуруп алгандардын саны 114 миңден ашты. АКШда 624 киши жуктуруп, 22 адам көз жумса, 15 киши бул оорудан сакайып чыкты. Орусияда 20 киши ооруну жуктурганы аныкталып, өлгөндөр тууралуу кабар жок. Ал эми Италия боюнча жалпысынан 9172 киши ооруга чалдыкса, өлгөндөрдүн саны 463 адамга жетти.

Эске сала кетсек, Кытай бийлиги 2019-жылдын 31-декабрында Дүйнөлүк саламаттыкты сактоо уюмуна (ДССУ) өлкөнүн борбордук бөлүгү Ухань шаарында белгисиз пневмония оорусу күч алганын билдирген. Адистер оорунун козгогучу коронавирус COVID-19 экендигин аныктап, эл аралык деңгээлдеги өзгөчө кырдаал жарыяланган. Андан бери бул вирус планетанын жашоочуларын кооптондуруп келе жатат.

Булак: NazarNews.kg