Кыргызстанда мүлктү мамлекеттин карамагына өткөрүү темпи кескин төмөндөдү. 2026-жылдын тогуз айында 113 объект мамлекетке өткөрүлсө, былтыр ушул мезгилде алардын саны 285ке жеткен. Бул 2,5 эсе аз.
Быйыл мамлекетке өткөрүлгөн объектилердин баасы 12 млрд 381,2 млн сомду түзгөн. Бирок бул эсеп мүлктөрдүн 52,2%ын гана камтыйт. Калган объектилердин наркы боюнча маалымат ачык жарыяланган эмес.
Президент Садыр Жапаров буга чейин коррупцияга каршы күрөштөн мамлекетке 4 млрд доллар түшкөнү тууралуу маалыматты четке кагып, айрым мүлктөрдүн баасы базар наркынан жогору көрсөтүлгөнүн билдирген. Учурда мамлекетке өткөн активдер кайра текшерилип жатканы айтылган.

Мамлекеттик мүлктү башкаруу агенттигинин 2025-жылдагы аудитинде 336,7 млн сом жана 3,6 млн долларлык финансылык мыйзам бузуулар аныкталган. Мындан тышкары, мамлекеттик мүлктүн электрондук реестри менен бухгалтердик эсептин ортосунда 12 млрд 752,9 млн сомдук айырма табылган.

Буга чейин укук коргоо органдарынын ишинин алкагында мамлекетке 1 488 объект ыктыярдуу өткөрүлгөнү маалымдалган. Алардын 171и сатылып, 269у мамлекеттик баланста калган, 1 048и мамлекеттик органдардын башкаруусуна берилген.

Маселе мүлктү мамлекетке кайтаруу менен эле бүтпөйт. Анын чыныгы баасы, ким тарабынан жана кандай негизде өткөрүлгөнү, сатылгандан түшкөн каражаттын кайда жумшалганы коомчулукка ачык болушу керек. Болбосо, коррупцияга каршы күрөштүн жыйынтыгын жарыяланган сандар менен гана баалоо жетишсиз.