Британ полициясы 22 адамдын өмүрүн алган Манчестердеги терактты уюштурууга шектелген алтынчы киши кармалгандыгын билдирди. Шаардын түндүк бөлүгүндөгү Блэкли шаарчасында жүргүзүлгөн тинтүү маалында бир аял кармалды.

Полиция өкүлү кеп кылмыштуу топ жөнүндө болуп жатканын жана полиция бүткүл Манчестер боюнча күчөтүлгөн тартипте издөө иштерин алып барып жатканын билдирди.

Улуу Британиянын ички иштер министри Эмбер Радд Манчестердеги теракт "мурдагылардан кыйла курч мүнөзгө ээ болгонун жана анын аткаруучусу жалгыз иштебегендигин» билдирди.

Буга чейин полиция Манчестердин батышындагы Виган шаарчасында бешинчи шектүү кармалганын билдирген. Колго түшүрүү маалында анын колунда баштык болгон, учурда ичинде эмне болгондугу такталууда.

23-майга караган түнкү жардыруу үчүн "Ислам мамлекети" экстремисттик тобу жоопкерчилик алган. Кандуу окуя миңдеген адамдар чогулган концерттен кийин болгон. Теракттын уюштуруучусу теги Ливиялык, бирок Манчестерде туулган 22 жаштагы Салман Абеди экендиги аныкталган. Терактка шектелип Улуу Британияда кармалган беш адамдын арасында анын Исмаил аттуу бир тууганы да бар. Ал ортодо Ливиянын күч түзүмдөрү Триполиде Салман Абединин атасы жана дагы бир бир тууганы камакка алынганын маалымдашты.

Манчестердеги теракттан улам америкалык ырчы Ариана Гранде «Коркунучтуу аял» аттуу дүйнөлүк турнесин убактылуу токтотту. 22-майдагы жардыруу анын концертинен кийин уюштурулган.

Булак: "centralasian.org"