Маалыматка караганда, буга чейин өз алдынча иш алып барып келген «Кыргыз Туусу» жана «Слово Кыргызстана» гезиттери, ошондой эле «Байчечекей», «Кырчын», «Жеткинчек» журналдары кайра уюштуруудан өттү. Анын алкагында «Кырчын» жана «Жеткинчек» журналдары жоюлуп, «Кыргыз туусу» басма үйү түзүлдү. Ага «Кыргыз Туусу», «Слово Кыргызстана» гезиттери, жаңы уюштурулган «Ала-Тоо» адабий журналы жана «Байчечекей» балдар журналы киргизилди.

Бардык аталган басылмалар мамлекеттик камсыздоого өткөрүлүп, кызматкерлердин эмгек акысы толугу менен бюджеттен төлөнмөй болду. Ошондой эле атайын эсепке түшкөн каражаттан калем акылар кошумча берилет.

Реформанын алкагында мурда ар бир басылмада өзүнчө болгон жетекчилик жана административдик кызматтар бириктирилип, бирдиктүү башкаруу системасы киргизилет.

Жооптуу тараптар бул өзгөрүүлөр мазмунду кыскартуу же улуттук басылмалардан баш тартуу эмес, тескерисинче, мамлекеттик каражаттарды сарамжалдуу пайдалануу, сапатты жогорулатуу жана басылмаларды модернизациялоо максатын көздөөрүн белгилешти.