Кыргызстандын Энергетика министрлиги россиялык "Росатом" мекемеси менен түзүлгөн атомдук станция тууралуу меморандум боюнча түшүндүрмө берди.

Маалыматка караганда, меморандум эки тараптын ортосунда "Экспо-2020" жарманкесинин алкагында 20-январь күнү кабыл алынган.

"Россиялык корпорация менен Кыргызстандын Энергетика министрлигинин ортосундагы кызматташуунун бир багыты катары биздин өлкөдө төмөн кубаттуулуктагы атомдук станция куруудагы мүмкүнчүлүгү талкууланган. Баса белгилеп кете турчу нерсе, азырынча кыргыз тарап россиялык атомчулардын долбоорлоруна кызыгуусу гана бар экенин айткан", — деп жазылат билдирүүдө.

Ошондой эле Кыргызстандын аймагына АЭС куруу чечимин кабыл алуу үчүн узак процессти басып өтүү керектиги айтылды.

"Бул процесс учурунда көп тараптуу экспертизалар жүргүзүлүп, эң биринчиден экологиялык коопсуздукка көңүл бурулат. Андан тышкары, техникалык-экономикалык негиздеме болушу зарыл. Эң негизгиси — маселе коомдук талкууга коюлуп, бардык мамлекеттик органдар менен макулдашуудан өтүшү кажет", — деп айтылат түшүндүрмөдө.

Буга чейин Россиянын "Росатом" мамлекеттик корпорациясы менен Кыргызстандын Энергетика министрлигинин ортосунда КР аймагында төмөн кубаттуулуктагы атомдук станция куруудагы кызматташуу боюнча меморандум кабыл алынганы боюнча маалымат тараган. Анда тараптар РИТМ-200Н реактордук орнотмосунун базасында атомдук электр станциясын (АЭС) курууга кызыкдар экени айтылган. Ошондой эле меморандумда Кыргызстанда ядердик инфраструктураны өнүктүрүү жана атомдук энергияны тынчтык жолунда пайдалануу боюнча илимий-техникалык персоналдын квалификациясын жогорулатуу маселелери каралган.

"Росатом" мекемесинин башкы директору Алексей Лихачев Кыргызстанда АЭС сыяктуу объектинин болушу өлкөнү электр энергиясы жагынан гана көз карандысыз кылбастан, бүткүл Борбор Азия чөлкөмүндө илимий долбоорлордун көбөйүшүнө өбөлгө түзөт деген оюн билдирген.

Булак: NazarNews.kg