Чындыкты чыркырата айткан жагынан Салижан акедей бир да кыргыз болгон эмес. Болбойт дагы.

Төмөндөгү ачуу чындыкты көрсөтүп турган сөздөрдү даярдаган белгилүү тележурналист Миржан Балабаев. 

Орустар кетип, эми түрктөрдү эзебиз

Кыргызстан жаңы эгемендикке жетишкен жылдары Түркиядан делегация келип, Бишкекти кыдырып көрүп жүрүшөт. Аларды коштоп жүргөндөрдүн ичинде Салижан Жигитов да бар. Көпкө кыдырышкан соң коноктордун бири түрк тилин мыкты билген Салижан акеге: «Силерди канча жылдар бою орустар эзип келгени көрүнүп турат. Караңызчы, борбор шаарыңар го жакшы жерде жайгашыптыр, бирок архитектуралык жасалгасы өтө эле көзгө комсоо экен, өңчөй бозоргон, бир кылка имараттарды кура беришиптир, -десе Салижан аке:

— Ой, гардаш, орустар бизди эмес, жетимиш жыл бою биз аларды эздик. Шаарларды, завод-фабрикаларды курдурдук, жол салдырдык, ушул шаарды да ошолор курган, кыскасы болгон иштин баарын жасатып алдык, мына эми биздин эзүүдөн кутулуп, өз өлкөсүнө кетип жатышат, — дебеспи. Анда таң кала түшкөн түрк:

— Орустар го кетип жатыптыр, эми кимди эзесиңер?- деп сураса, Салижан аке:

— Силер келип атпайсыңарбы, эми силерди эзебиз,- дейт имиш шак эле.

***

Са Жи Гит

«Азаттык» радиосу Дастан Сарыгулов, Каныбек Иманалиев, Салижан Жигитовду «Манас» жөнүндөгү диалогго чакырат. Сарыгулов «Манас» эпосунун чеги жогун, түбү көрүнбөстүгүн түгөтө албайт. Сакебиз болсо түз обо экенине карабай:

– Кыргыз болбой эле койдум. Карачы, курсагы ач, мээси бөксө. Ушундан көрө кытайга аралашып кетсек, эл болмокпуз. Анда мен көп болсо: Са Жи Гит болуп калмакмын, – деп Сарыгуловдун куйкасын куруштурган экен.

***

Кыргыз орусту 70 жыл эзди

90-жылдардан кийин Кыргызстандан орустар кете баштаганда жармач патриоттордон ким бирөө:

– Булардын кетип атканы жакшы болду. Болбосо бизди 70 жыл бою жакшы эле эзип келбедиби, – десе Сакебиз:

– Эй, орустар бизди 70 жыл эзген жок. Биз орустарды 70 жыл эздик. Алар бизге мектептерди, кабат үйлөрдү, завод-фабрика, суу сактагыч, көпүрө, электр станция ж.б. куруп бербедиби. Бечаралар акыры «Буларың эч нерсе үйрөнө албаган ит эл турбайбы» деп эзилип бүткөн үчүн кетип атпайбы, – деген экен.

Даярдаган: Миржан Балыбаев