Өзбекстандын президенти Шавкат Мирзиёевдин Беларусь Республикасына жасаган расмий сапары жыйынтыкталды. Минск шаарындагы эл аралык аэропорттон жогорку даражалуу конокту Беларусь президенти Александр Лукашенко узатты.

Сапардын алкагында эки өлкөнүн лидерлери алгач тар курамда, андан соң расмий делегациялардын катышуусунда кеңейтилген форматтагы сүйлөшүүлөрдү өткөрүштү. Жолугушууда эки тараптуу кызматташтыкты кеңейтүү, саясий диалогду тереңдетүү жана парламенттер аралык байланыштарды бекемдөө маселелери негизги көңүл борборунда болду.

Сүйлөшүүлөрдүн эң башкы жыйынтыгы катары Өзбекстан менен Беларусь ортосунда стратегиялык өнөктөштүк мамилелерин түзүү жөнүндө декларацияга кол коюлду. Ошондой эле мамлекет башчыларынын катышуусунда эки өлкөнүн ортосунда бир катар эки тараптуу келишимдер алмашылып, жаңы долбоорлорду ишке ашырууга жол ачылды.

Бул документ эки мамлекеттин мамилеси эми жөн гана достук кызматташтык деңгээлинен стратегиялык өнөктөштүк баскычына чыкканын көрсөтөт.

Тараптар өнөр жай, машина куруу, айыл чарба, азык-түлүк коопсуздугу, фармацевтика, транспорт-логистика жана билим берүү тармактарында кызматташууну дагы кеңейтүүгө кызыкдар экенин билдиришти.

Беларусь оор өнөр жайы жана айыл чарба техникаларын өндүрүү боюнча КМШдагы алдыңкы өлкөлөрдүн бири болсо, Өзбекстан Борбор Азиядагы эң ири рыноктордун бири катары беларусь продукциясы үчүн маанилүү өнөктөш болуп эсептелет.

Президенттер жалпыга маалымдоо каражаттарына жасаган билдирүүсүндө бул расмий сапарды эки өлкөнүн мамилесиндеги тарыхый окуя деп аташты.

Алардын пикиринде, стратегиялык өнөктөштүк жөнүндө декларация мамлекеттер аралык кызматташтыктын жаңы барагын ачып, келечекте биргелешкен инвестициялык долбоорлордун көбөйүшүнө шарт түзөт.

Бул сапар Борбор Азия менен Чыгыш Европанын ортосундагы экономикалык байланыштарды чыңдоого багытталган дагы бир маанилүү кадам катары бааланууда.

Акыркы жылдары Өзбекстан тышкы саясатында көп багыттуу дипломатияны жүргүзүп, КМШ өлкөлөрү, Европа жана Азия мамлекеттери менен кызматташтыкты активдүү өнүктүрүүдө. Беларусь болсо Батыш өлкөлөрүнүн санкцияларынан кийин КМШ жана Азиядагы өнөктөштөр менен экономикалык алакаларды кеңейтүүгө өзгөчө көңүл буруп келет.

Эксперттердин пикиринде, стратегиялык өнөктөштүк макамы эки өлкөнүн соода жүгүртүүсүн көбөйтүүгө, өнөр жай кооперациясын өнүктүрүүгө жана жаңы инвестициялык долбоорлорду ишке ашырууга өбөлгө түзөт.

Ошондой эле бул келишим Өзбекстандын аймактагы экономикалык лидерлик позициясын бекемдөөгө жана Евразия мейкиндигиндеги өнөктөштөр менен байланышын дагы тереңдетүүгө багытталган дипломатиялык кадам катары каралууда.

Расмий сапар аяктагандан кийин президент Шавкат Мирзиёев Ташкент шаарына кайтып кетти.