Молдова ырааттуу түрдө Көз карандысыз мамлекеттердин шериктештигинен (КМШ) чыгуу саясатын күчөттү. Өлкөнүн Тышкы иштер министрлиги уюмдун негизги макулдашууларын денонсациялоо жол-жобосун баштаганын расмий түрдө жарыялады. Бул кадам Молдованын геосаясий багытында олуттуу бурулуш болуп калышы мүмкүн.

ТИМ башчысы Михай Попшой билдиргендей, КМШ үчүн чечүүчү мааниге ээ болгон үч келишим жокко чыгарылса, Молдова уюмдан толук чыгат. Бул маселени жакын арада парламент карап, соңку чечимге президент Майя Санду кол коюшу күтүлүүдө.

Чынында, Молдова КМШдан формалдуу түрдө чыга элек болсо да, практикалык кызматташуудан дээрлик баш тарткан. Өлкө 2022-жылдан бери КМШ жыйындарына катышпай, Евразиялык экономикалык биримдиктеги байкоочу макамын да иш жүзүндө колдонбой калды. Расмий Кишинёв Батышка, айрыкча Европа Биримдигине интеграцияны артыкчылык катары көрүп, өз саясатын “европалык стандарттарга ылайык келтирүү” максатын ачык билдирүүдө.

Акыркы кездери Молдова КМШ алкагында кабыл алынган жүздөгөн документтердин бир бөлүгүн гана аткарып, калганын четке каккан. Бул уюмдун өлкө үчүн мааниси азайып бара жатканын көрсөтөт.

Бирок бул жол бир добуштан колдоого ээ эмес. Оппозиция өкүлдөрү мындай кадам экономикалык байланыштарга, өзгөчө Россияда жана башка КМШ өлкөлөрүндө иштеп жүргөн эмгек мигранттарына терс таасирин тийгизерин эскертишүүдө. Алардын пикиринде, саясий багытты өзгөртүү калктын социалдык кызыкчылыгы менен шайкеш келбейт.

Молдованын мурдагы президенти Игорь Додон да азыркы бийликтин саясатын сынга алып, бул курс улуттук кызыкчылыкка жана жарандардын көпчүлүгүнүн көз карашына каршы келерин белгиледи.

Бирок Молдованын азыркы саясий жетекчилиги КМШдан чыгуу аркылуу өз келечегин Батыш менен байланыштырууну көздөп жатат. Бирок бул тандоо өлкөгө узак мөөнөттүү пайда алып келеби же жаңы экономикалык жана социалдык тобокелчиликтерди жарататбы деген суроого жооп али жок.