Ушул тапта Москванын Красногорск шаарындагы Crocus City Hall имаратында концерт учурунда белгисиз адамдар ок чыгарган. Жабыркагандардын саны өсүүдө. Бул тууралуу бир катар орусиялык жана чет элдик басылмалар жазып чыгышты.

Алдын ала маалымат боюнча, имаратта өрт чыккан. Күбөнүн айтымында, концерт баштала электе белгисиз адамдар залда жана анын сыртында автоматтан ок чыгара башташкан. Кийин комплексти коюу түтүн каптаган.

Окуянын алгачкы секундаларын көрсөткөн видеодо куралчан эки адам тартылган. Бирок алардын саны бештен кем эмес экени айтылууда.

Окуя болгон жерге Москванын атайын ыкчам отряды жана атайын багыттагы мобилдик отряды, ошондой эле өрт өчүрүүчүлөр жөнөтүлгөн. Имараттан 100гө жакын адам эвакуацияланган.

Москва облусунун губернатору Андрей Воробьев оперативдүү штаб түзүлгөнүн билдирди. Комплекске 30дан ашык областтык жана 20 борбордогу тез жардам бригадалары келишти. Акыркы маалыматтарга караганда, жабыркагандардын саны 40 адамга жетти. Социалдык тармактарда да олуттуу үзгүлтүктөр бар.

Москва районунун укук коргоо органдары жана атайын күчтөрү чукул кырдаалда.

Эскерте кетсек, 7-мартта АКШнын Орусиядагы элчилиги Москвада теракт болушу мүмкүн экенин эскерткен.

Булак: NazarNews.kg