Ооганстанда бийликти басып алган "Талибан" кыймылы жаңы өкмөттүн курамын жарыялады. Мамлекеттин башына 60 жаштагы, радикалдуу кыймылдын жетекчиси Хайбатулла Ахунзада отурду.

Өкмөт башчынын милдетин аткаруучу молдо Мохаммад Хасан Ахунд буга чейин кыймылдын Башкаруу кеңешин жетектеген. Бул тууралуу "Талибандын" маалымат катчысы Забиулла Мужахид билдирди.

Чалгын министри болуп Гуантанамодогу америкалык түрмөдө 12 жыл отурган Абдул Хак Васик дайындалды. Ички иштер министри – "Хаккани түйүнү" тобунун негиздөөчүсүнүн уулу Сиражуддин Хаккани, коргоо министри – "Талибандын" түптөөчүсүнүн уулу Мухаммал Якуб Мужазид, мурдагы тышкы иштер министри Мохаммад Ханиф Атмар экономика министри болуп дайындалган.

Дээрлик бардык таасирдүү министрликтер талибдердин өкүлдөрүнө тийди. Буга чейин "Талибан" өлкөдөгү ар кыл топтордун өкүлдөрү кирген мунаса өкмөт курулат деп убада кылган.

Бул ортодо Тажик президенти Эмомали Рахмон Ооганстанда бардык этностордун кызыкчылыгын камтыган өкмөт куралбаса, Тажикстан “Талибанды” тааныбай турганын билдирген. Панжшер провинциясында тажик жана өзбек тектүү кошуундардын башын кошкон "Талибанга" каршылык көрсөтүү кыймылы түзүлгөн.

Эске салсак, 15-августта "Талибан" кыймылы Кабулдагы өкмөттү кулатып, өлкөдөгү 20 жылга созулган жарандык согуш аяктаганын жарыялаган эле. Президент Ашраф Гани ошол күнү Ооганстандан чыгып кеткени айтылды.

14-августтан тарта АКШ башка союздаштары менен 122 миңден ашуун кишини ооган жергесинен эвакуациялады. Августтун этегинде Вашингтон америкалык аскерлерин толук чыгарып кетип, 20 жылдык аскердик миссиясы аяктаганын билдирген.

Булак: NazarNews.kg