Нарын районунун (Нарын облусу) Сары-Бел жайлоосунда 3-май күнү чабандар оорулуу ак илбирсти кармап алышты. Бул тууралуу эколог Рутбек Абдыраев билдирди.

"Анын эки көзү начар көрөт экен. Тиштери начар. Музоонун этин жебей койду. Ал Ысык-Көлдөгү реабилитациялык борборго жөнөтүлдү", - деди ал.

Учурда бул ак илбирс Ысык-Көлдөгү Ананьево айылында жайгашкан реабилитациялык борбордо. Эми бул жаныбардын саламаттыгына атайын адистер көз салышат.

Ак илбирс - Кызыл китепке кирген жана өзгөчө коргоого алынган жаныбар. Расмий маалыматка караганда, Кыргызстанда 324 ак илбирс бар. Аны аткандарга 1,5 миллион сомдук айыппул каралган.

Булак: NazarNews.kg