Бишкек шаарында жана Чүй облусунда 18-майдын кечинде жааган нөшөр жаандан кийин айрым жерлерди суу каптады. Бул тууралуу ӨКМдин басма сөз кызматы билдирди.

Маалыматка ылайык, Биринчи Май районунда жаан суусу үч турак үйдүн короосуна жана бир үйдүн жертөлөсүнө, Ленин районунда бир үйдүн короосуна кирген.

"Чүй облусунун Аламүдүн районунда арыктан суу ашып, Пригородное айылындагы бир үйдүн короосун каптап кеткен.

Куткаруучулар жерине барып, тазалоо жана суунун нугун буруу иштерин жүргүзүшкөн. Адамдар жабыркаган жок", - деп айтылат маалыматта.

ӨКМ 19-20-майда да республиканын тоолуу аймактарында жана тоо этектериндеги райондордо сел жүрүшү мүмкүн экенин, дарыяларда суунун деңгээли көтөрүлүшү ыктымалдыгын эскертүүдө.

Булак: NazarNews.org