Бүгүнкү күндө  Кыргызстанда Сауд Арабиядан келген 142 киши обсервацияда жатат. Алардын облус боюнча саны: Баткенде- 8, Жалал-Абадда- 48, Ошто- 64, Чүйдө- 4, Нарында- 1, Ысык-Көлдө-1, Бишкекте- 19 киши обсервацияга алынган.

Бул тууралуу Саламаттыкты сактоо министри маалымдап: “Бул кишилерден коронавирус аныкталган эмес, байкоодо гана турат. Алар учакта коронавирус жуктурган 3 киши менен чогуу учуп келгендиктен, карантинде турат.

Анын ичинен бешөөсү ооруканада жатып дарыланып жатышат”,-деп билдирип, аларда коронавирус жоктугун баса белгиледи. Алар чек арадан келишкендиктен аз дегенде 14 күн карантинде турушу керектигин кабарлады.

Оорукананын шартына нараазы болгондор тууралуу: “Бизге коронавирус катталганы тууралуу маалымат 17-мартта саат 7лерде белгилүү болду. Колубуздагы тизме менен ыкчам түрдө элди убактылуу изоляцияга жаткырдык. Алар сабырсыздык кылып, фейк маалыматтарды таратып жиберишти. Бүгүн алар татынакай шарттагы мейманканага жаткырылды”,-деп айтып, “Кыргызстанда согуш болуп жаткан жок. Бул-инфекциялык оору. Таралуу жана өлүмү жогору болгон оорулардын ичинен төмөнкү орунда турат. Бул илдет бизде жаңы катталып жатканы үчүн ажиотаж болууда.

Биздин негизги милдет- эң биринчи аларды изоляцияга алуу болчу. Аны биз аткардык. Башкача айтканда, 24 сааттын ичинде Кыргызстанга кирип кеткен 142 кишини таптык. Бул чоң жумуш. Медициналык кызматкерлер, укук коргоо органдары күнү-түнү уктабай, болгон күчүбүздү жумшадык”,-деп элди сабырдуулукка жана жардам берүүгө чакырды.

Булак: NazarNews.kg