Ош шаарындагы Манас-Ата кичи районунда Жекелик (Яккалик) каналына 10-август күнү 60-61 жаштагы эки киши бири-бирин куткарам деп жатып чөгүп кеткен. Бул тууралуу Ош шаардык ички иштер башкармалыгынын басма сөз катчысы Абсаттар Табакалов билдирди.

Табакаловдун айтымында, баштапкы маалыматтарга караганда кишилер спирт ичимдигин ичип, каналдын жанында эс алып жаткан учурда бирөө сууга түшүп, экинчиси аны куткарууга аракет жасаган.

Издөөнүн негизинде алардын сөөгү ошол эле күнү табылып, туугандарына өткөрүлүп берилген. Туугандары сөөктү экспертизага берүүдөн баш тартышкан. Окуя "Кокустук" беренеси менен катталып, учурда териштирүү иштери жүрүүдө.

Булак: NazarNews.kg