Европа Чемпиондор лигасынын финалында «Пари Сен-Жермен» (ПСЖ) клубунун жеңишинен кийин Франциянын борбору Париж шаарында массалык башаламандыктар орун алды. Бул тууралуу Франциянын Ички иштер министрлиги билдирди.

Маалыматка ылайык, окуялардын кесепетинен бир адам каза болуп, дагы бир адам комага түшкөн. Жалпысынан 219 адам жаракат алып, 800гө жакын киши кармалган.

Каза болгон жаран 2002-жылы туулган. Ал майрамдык иш-чаралар учурунда мотоциклди башкара албай калып, бетон тосмого сүзүлгөн.

Бир нече сааттан кийин 17 жаштагы өспүрүмгө бычак менен кол салуу болгон. Күбөлөрдүн айтымында, өспүрүм талап-тоноого аракет кылгандан кийин төрт адам тарабынан сабалган. Ал оор жаракаттар менен ооруканага жеткирилген.

Финалдык оюн аяктагандан кийин Эйфель мунарасы ПСЖ клубунун түстөрү менен жарыктандырылган. Миңдеген күйөрмандар көчөлөргө чыгып, клубдун тарыхындагы ири жеңишти майрамдай башташкан.

Айрыкча борбор калаанын негизги көчөлөрүндө абал курчуп, бул аймакка болжол менен 20 миңдей күйөрман чогулган. Майрам бара-бара полиция менен кагылышууларга, пиротехникалык каражаттарды жардырууга жана өрт кырсыктарына айланган.

Тартипсиздиктердин натыйжасында кеминде алты автоунаа, наабайкана жана ресторан имараттары жабыркаган. Эйфель мунарасынын айланасында таштанды контейнерлери өрттөлүп, полиция элди таратуу үчүн көздөн жаш агызуучу газ колдонгон.

«Парк де Пренс» стадионунун аймагында да күйөрмандар полиция кызматкерлерине пиротехникалык каражаттарды ыргытышкан. Жергиликтүү маалымат каражаттарынын маалыматына ылайык, 150гө жакын күйөрман стадионго күч менен кирүүгө аракет кылган.

Окуялардын алдын алуу максатында Франциянын бийлиги алдын ала 22 миң полиция кызматкерин жана жандармды кызматка тарткан. Алардын 8 миңи Парижде жана анын айланасында коопсуздукту камсыздаган.

ПСЖ клубунун президенти Нассер Аль-Хелаифи күйөрмандарды сабырдуулукка чакырып, тартип бузбоону өтүнгөн. Клуб дагы майрамды жоопкерчилик менен өткөрүүгө үндөгөнү менен, бул чакырыктар башаламандыктын алдын ала алган эмес.

Ошого карабастан, Франциянын Ички иштер министрлиги Париждеги чемпиондук парадды жокко чыгарууга негиз жок экенин билдирген.

Эске салсак, 30-май күнү өткөн финалда ПСЖ пенальтилер сериясында Arsenal клубун 4:3 эсебинде жеңип, Чемпиондор лигасынын кубогуна ээ болгон.