Германиянын канцлери Олаф Шольц менен Франциянын президенти Эммануэль Макрон Американын инфляцияга каршы мыйзамын ишке ашыруу боюнча АКШ менен макулдашууга аракет кылууда, бирок сүйлөшүүлөрдөн майнап чыкпаса, каршы чараларды көрүшүүдө. Кечээ, 27-октябрда "Politico" басылмасы Шольц менен Макрондун Париждеги жолугушуусунун жыйынтыгын жазып чыкты.

Германия менен Франция Евробиримдиктин экономикалык жактан эң күчтүү өлкөлөрү, ошондой эле коомдун башка мүчөлөрү катары Американын мыйзамын протекционисттик жана европалык өнөр жай жана өндүрүшчүлөргө сокку деп эсептешет. Гезиттин маалыматына караганда, Макрон менен Шольц Америкада өндүрүштү баштаган компанияларды субсидиялоо планы рынок принциптерин бузуп, өз аймагына өндүрүштү тартууну көздөп жатканына макул экендиктерин ырасташты.

Басылманын айтымында, эки өлкөнүн лидерлери эгер Вашингтон бул мыйзамды азыркы түрүндө аткарууну талап кылса, Евробиримдик бир орунда тура албайт деп макулдашты. Мыйзам АКШда ачылган ишканалар үчүн салыктарды кыскартуу, энергетикалык стимулдарды сунуштайт жана жалпысынан коомчулукту америкалык продукцияларды сатып алууга үндөйт. Бул өзгөчө европалык автоөндүрүүчүлөрдүн кыжырын келтирген электромобилдерди сатууга да тиешелүү.

Politico билдиргендей, Шольц менен Макрон Париждеги жолугушуусунун аягында АКШ мыйзамды европалык өнөр жайга зыян келтире турган болсо, Евробиримдик жооп кайтарарын кыйытты. Кеп АКШнын протекционизмине каршы чаралар, башкача айтканда, Евробиримдиктеги ишканаларды ушундай эле жол менен субсидиялоо жөнүндө болуп жатат. Ошентип, биримдик, Шольц менен Макрондун айтымында, АКШ инфляцияны азайтуу үчүн мыйзамдар аркылуу ээ болгусу келген адилетсиз атаандаштык артыкчылыктарын нейтралдаштыра алат. Бирок, гезит мындай кадам «трансатлантикалык соода согушунун» жаңы этабын башташы мүмкүн экенин белгилеген.

Булак: NazarNews.kg