Путинден кийин Орусияны ким башкарат?

Журналист: АЙСУЛУУ ТАЛАНТ

12.08.2026, 11:37

6778

дүйнө жүзүндө

Орусиянын президенти Владимир Путинден кийинки бийлик кимге өтөрү азырынча белгисиз. Foreign Affairs басылмасы бул маселеде негизги көйгөй Путиндин өзү эмес, анын айланасында көп жылдан бери калыптанган кары саясий элита экенин жазат.

Путин бийликти сактоо үчүн өзүнө берилген тажрыйбалуу адамдардан турган системаны түзгөн. Бирок бул жаңы муундун саясатка аралашуусун чектеп, кийинки лидерлердин даярдалышын жайлаткан.
Путинден кийинки президент болушу мүмкүн делген талапкерлер катары:

•   Алексей Дюмин — 53 жашта;
•   Вячеслав Володин — 62 жашта;
•   Михаил Мишустин — 60 жашта;
•   Сергей Кириенко — 64 жашта.

Ошол эле учурда Путиндин айланасындагы азыркы жогорку кызматтагы адамдардын көбү улгайган. Алардын ордуна алардын балдары жана жаш кадрлардын тез көтөрүлүп жатышы элитанын ичинде муундар аралык чыңалууну күчөтүшү мүмкүн.

Путинден кийинки кырдаал 1953-жылы Сталин каза болгондон кийинки СССРдеги бийлик талашына окшош болушу мүмкүн экени айтылат. Эгер бийлик күтүүсүз өтсө, формалдуу конституциялык механизмдерден тышкары, күчтүү мамлекеттик институттарды көзөмөлдөгөн жана жеке байланыштары бар адамдардын күрөшү чечүүчү ролду ойношу мүмкүн.

Эгер мураскерлик боюнча так механизм болбосо, Орусияда саясий элитанын ичинде олуттуу бийлик талашы жана башаламандык жаралышы мүмкүн.