Украина бийлигинин Буча шаарындагы россиялык жоокерлердин "кылмышын" тастыктады делген материалы — кезектеги чагымчылык. Бул тууралуу Россиянын Коргоо министрлиги билдиргенин РИА Новости жазды.

"Киев режими тарабынан россиялык жоокерлердин "кылмышын" далилдейт деп жарыяланган сүрөттөр жана видеоматериалдардын баары кезектеги чагымчылык", — дешти ведомстводон.

Билдирүүдө россиялыктар көзөмөлдөгөн аймакта бир дагы жергиликтүү тургун зордук-зомбулуктан жабыркабаганы айтылат. Министрлик аскер бөлүктөрдүн баары шаардан 30-мартта, Москва менен Киев өкүлдөрүнүн Стамбулдагы сүйлөшүүлөрүнөн кийин эле чыгып кеткенин эске салды.

"31-мартта Буча шаарынын мэри Анатолий Федорук өзүнүн видеокайрылуусунда калаада бир да россиялык жоокер калбаганын тастыктаган, ал көчөдө атылган жергиликтүү тургундар тууралуу эч нерсе айткан эмес. Андыктан "кылмыштын далилдери" Коопсуздук кызматы менен украин телевидениесинин өкүлдөрү келген төртүнчү күнү гана пайда болгону таң калычтуу деле эмес", — деп айтылат билдирүүдө.

Мындан тышкары, Киев режими жарыялаган маркумдардын сөөгү төрт күн өтсө да катыбай, кадимкисиндей экенине көңүл бурушкан.

"Мунун баары Бучадагы сүрөттөр менен видеокадрлар Батыш ЖМКлары үчүн Киев режими тарабынан атайын даярдалган кезектеги спектакль. Мындайга Мариуполдун төрөт үйүндөгү окуяны кошсок болот", — деп айтылат билдирүүдө.

Министрлик шаардын түштүк аймагы украин тараптан аткылоого туш болуп келгенин эске салды. Ал эми Россия Киев облусуна 452 тонна гуманитардык жардам жеткирип, армия жай тургундардын шаарда ары-бери жүрүүсүнө жана мобилдик байланыш колдонуусуна эч тоскоолдук жараткан эмес.

Эске салсак, Орусия Украинага каршы согушту 24-февралда баштаган. Путин анын максаты «сегиз жылдан бери Киев режиминин басмырлоосуна, геноцидине кабылып келгендерди коргоо» жана бул үчүн «Украинаны демилитаризация жана денацификация» жасап жана Донбасстагы «жай жашоочулардын канына забын болгондорду» аскер сотуна берип, жоопкерчиликке тартуу пландалып жатат, деп айткан.

Орусия - анын куралдуу күчтөрү аскерий соккуларды Украинанын аскердик инфраструктурасы менен күч түзүмдөрүнө уруп жаткандыгын, жай жарандарга багытталбагандыгын билдирет. Орусиянын колдоосу менен ДЭР жана ЛЭР топтору да өз аракеттерин улантууда. Путин - Украинаны оккупациялоо туурасында кеп жок экенин айтат.

Булак: NazarNews.kg