Бүгүн, 15-майда, «Заманбап кардиохирургия — академик И.К. Ахунбаевдин мурасы» аттуу IX жыл сайын өтүүчү эл аралык илимий-практикалык конференциянын ачылышынын алдында Кыргыз Республикасынын Саламаттык сактоо министрлигинде Кыргыз Республикасынын Саламаттык сактоо министри Дамир Осмонов жана саламаттык сактоо министринин орун басары Бакытбек Кадыралиев Россия Федерациясынын кардиохирургия жана жүрөк-кан тамыр жаатындагы алдыңкы адистеринин делегациясы менен жолугушуу өткөрдү. Бул тууралуу аталган министрликтин басма сөз кызматы билдирди.

Жолугушууга Россиянын алдыңкы кардиохирургдары, жүрөк-кан тамыр хирургиясынын федералдык борборлорунун, профилдик илимий-изилдөө институттарынын жана Пермь, Томск, Астрахань жана башка Россия Федерациясынын шаарларындагы клиникалардын жетекчилери катышты. Ошондой эле делегациянын курамында жогорку технологиялык медициналык жардамды өнүктүрүүгө жана заманбап дарылоо ыкмаларын киргизүүгө активдүү катышкан кардиохирургия, рентгенэндоваскулярдык хирургия, аритмология, медициналык жардамдын сапатын башкаруу жана жүрөк-кан тамыр медицинасы жаатындагы адистер болду.

Жолугушуунун жүрүшүндө тараптар кардиохирургиялык кызматты өнүктүрүү, кесиптик кызматташууну чыңдоо, тажрыйба алмашуу, медициналык кадрларды даярдоо жана саламаттык сактоо системасына заманбап технологияларды киргизүү маселелерин талкуулашты.

Кыргыз Республикасынын Саламаттык сактоо министри Дамир Осмонов академик И.К. Ахунбаевдин мурасына арналган конференцияны өткөрүү ата мекендик кардиохирургияны жана эл аралык кесиптик өз ара аракеттенүүнү өнүктүрүү үчүн өзгөчө мааниге ээ экенин белгиледи.

«Кардиохирургия бүгүнкү күндө медицинанын эң ыкчам өнүгүп жаткан багыттарынын бири болуп саналат. Инновациялык технологияларды киргизүү, аз инвазивдүү дарылоо ыкмаларын өнүктүрүү жана жасалма интеллектти колдонуу адамдардын өмүрүн сактап калуу жана медициналык жардамдын сапатын жогорулатуу үчүн жаңы мүмкүнчүлүктөрдү ачууда», — деп белгиледи министр.

Саламаттык сактоо министрлигинин башчысы ошондой эле эл аралык конференция илимий жетишкендиктер менен алмашуу, актуалдуу чакырыктарды талкуулоо жана ар түрдүү өлкөлөрдүн медициналык мекемелеринин ортосундагы кызматташууну кеңейтүү үчүн маанилүү аянтча болоруна ишеним билдирди.

«Заманбап кардиохирургия — академик И.К. Ахунбаевдин мурасы» аттуу IX жыл сайын өтүүчү эл аралык илимий-практикалык конференция Кыргыз Республикасында 15-майдан 17-майга чейин өтүп, ага Кыргызстан, Россия, Казакстан, Өзбекстан, Сауд Аравия жана башка өлкөлөрдүн алдыңкы адистери катышат.