“NazarNews” маалымат агенттиги жарандык активист Шаирбек Маматокторов менен баарлашып, өкмөттүн дарыгерлерге жетишерлик көңүл бура албай жатканы боюнча  пикирин уктук

--Шаирбек мырзы, иш учуруда коранавирус жуктуруп алган дарыгерлер өздөрүн эч кимге кереги жоктой сезе башташты. Алардын андай абалына ким күнөөлүү?

--Дарыгерлерди ошондой абалга кептеген өкмөт. Аларга шарт түзбөгөн, карабаган өкмөт - эл душманы! Илдет жуккан 489 адамдын 116 сы дарыгерлер. Канча миллион жардам келди, канчалаган миллиондорду ишкерлер жыйнап берди. Ал эми шалаакы өкмөт абалды жакшыртмак турсун, ого бетер начарлатып салды. 

Абылгазиев керт башы менен жооп берсин! Колдорунан  иш келбесе баары кетсин. Эгерде өздөрүн керексиз сезип жаткан  дарыгерлерден да кечирим суратсаңар, анда ишиңердин бүткөнү! Саламаттыкты сактоо министринин  орун басары брифинде дарыгерлер боюнча эчтеке айткан жок. Эмне үчүн маалыматты жашырып жатышат деген суроо ар бирибизди ойго салды.

--Опурталдуу вирусту жугузуп  алган дарыгерлерге төлөнчү компенсация алардын түйшүгүн жеңилдетет деп ишенсек болобу?

--Биротоло жеңилдетпесе да жардам болот. Анткени, дарыгерлер  өздөрүнүн өмүрлөрүн тобокелге салып, алдыңкы сапта коронавирус  менен күрөшүп жатышат. Башка өлкөлөрдө дарыгерлерге ири компенсация бергенден сырткары, жалпы коомчулук күн сайын кол чаап, флеш-моб уюштурушуп, алар үчүн балкондордон ырдап, колдоп жатышат. А бизде, дарыгерлер тамагы ал тургай маскасы жок иштешти. 

Биз бүгүн жана мындан ары, эң биринчи – дарыгерлерди коргошубуз керек. Аларды камсыздай албасак, анда бүт элдин саламаттыгы коркунучта!

--Башында шалаакылыкка жол беришкени  үчүн  Алтынай Өмүрбекова менен мурунку Саламаттыкты сактоо министри Космосбек Чолпонбаев кызматтан алынган. Эми алар кенебестиги үчүн жоопко тартыш керекпи?

--Космосбек Чолпонбаевди анык жоопко тартуу керек! Ал эми Өмүрбекованы неге жоопко тартуу керек? Ал эмне, дарыгерби? Же чек арада туруп, текшериш керек беле? Карантиндик посттордогу дарыгерлердин иши боюнча Чолпонбаев жоопкер, ал эми катуу тартип орното албаган органдар биринчи вице-премьерге баш ийишет. Анда кантип мунун баарына социалдык блокко жооптуу вице жоопко тартылуусу керек? Албетте, Өмүрбекова таптакыр эле кынтыксыз дегенден алысмын. Себеби, Саламаттыкты Сактоо тармагы анын түздөн түз жоопкерчилиги. Бирок, азыркы системадагы кемчилик – тийиштүү министрликтердин ишине вице-премьер жоопкер болгону менен, иштей албаган министрди кызматтан алуу укугуна ээ эмес. Андай шалаакыларды керек болсо премьер-министр да ала албайт. Себеби, портфелдер парламенттик фракциялардын “энчиси” болуп калган. Мына мисал – ошондой тажрыйбалуу Өмүрбекованын ордуна келген Аида Исмаилова. Резюмесин карасаңыз, вице-премьер эмес, мектептин директорлугуна жарабаган адам келип олтурат. Болгону котормочу агенттигин жетектеген, а кийин ал дагы Чолпонбаевдей болуп, дары – дармек бизнесине тийешеси бар адам, минтип өтө татаал мезгилде жооптуу кызматка дайындалды. Ошол күндөн бери, ал айымдын үнү эмес, жыты да жок.

--Ушундай жагдайды жаратып, коронавирусту алдын албаганы үчүн  премьер-министр да кызматтан кетиши керекпи?

--Сөзсүз түрдө! Баш мыйзамдын 5-бөлүмүнун 85–беренеде көрсөтүлгөн ирээтте, парламент эбак Өкмөткө импичмент жарыялап, отставкага кетириши керек эле. Бирок, “чөнтөк” парламент мындай кадамга бара албайт. Саналуу депутаттардан башкасы, өз кызыкчылыгын гана көздөп, элге бир да пайдасы жок, бийликке кошомат калгандан башка нерсени билбеген сабатсыздар.

Албетте,  86-беренеде Өкмөт башы өзү билип эле, Өкмөткө ишеним көрсөтпөөнү сурана турган норма бар. Бирок, биздин премьердин андай нерсеге аң-сезими, саясий эрки жете турганына менде чоң күмөн бар. Мындай норма, биздин мансапкор чиновниктердин заманында, жакынкы 50 жылда да ишке кирбесе керек. Анткени, биздин чиновниктер кадай абал болсо да  эптеп кызматка илешип турууну жоопкерчиликтен да жогору көрүшөт.

Булак: “NazarNews.kg”