Сатып жедиң суусун жердин байлыгын, 
Тоону бузуп андан чыккан алтынын. 
Силерчилеп жебесе да камадың, 
Камагандай күнөөсү не Садырдын? 

Кылмыш беле элдин камын жегени, 
Кумтөр элге кызмат кылсын дегени. 
Силерчилеп канын төгүп элинин, 
Бийлигиңди басып алам дедиби? 

Мөңгү ээрип, жаратылыш бузулуп, 
Цианидден мутант балдар туулуп. 
Кудайдан да коркпой калган силерди, 
Калса экен келечекте ант уруп! 

Карыганда сакалынан жаш тамып, 
Үшкүргөндө үшкүрүгү таш жарып. 
Арман толо өтүп кетти ак сакал, 
Садырым деп сагынычтан саргайып! 

Мойнуна илип куру доомат жалааны, 
Ажыраттың ата менен баланы. 
Кош ата деп сапарына узатып, 
Колун кармап беттен сылай албады! 

Максаттарга жеттиңерби көксөгөн? 
Бул дүйнөдөн кимдер гана өтпөгөн. 
Баласы үчүн атасынан өч алган, 
Мен силердей айбандарды көрбөгөм! 

Жолуктурбай атасына баласын, 
Кара өзгөйлөр ал ишиңден не таптың. 
Ак сакалдын көздөрүнөн жаш акса, 
А силердин көзүңөрдөн кан аксын! 

Прокурорбу, сотуңарбы баарыңды, 
Чал каргышы тынч койбосун жаныңды. 
Көзүң жайнап сулап жатып калганда, 
Уул-кызың сурабасын алыңды. 

Садыр болсо калың элдин ардагы, 
Аман болсо көп иш кылат ал дагы. 
Алтын башы аман болсун дайыма, 
Атасынын колдоп жүрсүн арбагы! 

Калбаса экен эч ким мындай кайгыда, 
Жакшы күндөр күтүп жатат алдыда. 
Жүзү жарык эл алдына чыкса деп, 
Көңүл айтып Сабыр тилейм Садырга! 

Автор: Бөрүкулов Шамурза  
Ала-Бука району

Булак: NazarNews.kg