27-апрелде Өзбекстандын Бухара, Навои, Самарканд жана Кашкадария облустарында катуу шамал болуп, калктын жашоосуна, инфраструктурага жана айыл чарба өсүмдүктөрүнө чоң зыян келтирди. Өзбекстан Республикасынын Президенти Шавкат Мирзиёев Бухарада болуп өткөн табигый кырсыктын кесепеттерин карап чыгуу, зарыл чараларды аныктоо жана калк менен түз байланышуу максатында Бухара облусуна барып, жергиликтүү тургундар менен жолугуп кайтты.

Алат районунун борборунда жергиликтүү тургундар жана активисттер менен жолугушуу болуп өттү. Мамлекет башчысы кечээги катуу шамал күтүүсүз жана болуп көрбөгөндөй табигый кырсык болуп, адамдардын жашоосуна, айыл чарбасына жана башка тармактарга терс таасирин тийгизгендигин өкүнүү менен белгиледи.

--“Элибиз биримдикте болуп, көптөгөн сыноолорду жеңди. Бул жолу дагы керектүү чаралар көрүлүп, кырсыктын кесепеттери тез арада жоюлат. Эң негизгиси, жакшы ниеттерибизди өчүрбөстөн бирге күрөшсөк, анда биз, бул кыйынчылыктарды жеңебиз”, - деди Президент 28-апрелде эл менен жолугушуусунда. 

Президент алгач табигый кырсыктан жапа тарткандарды тик учак менен абадан көзөмөл кылган.

Президент Шавкат Мирзиёев Бухара облусуна жасаган иш сапарында Бахауддин Накшбанддын мавзолейине барды.

Президент, Өзбекстан калкына Ыйык Рамазан күндөрүндө Алла Таала элибизге тынчтык жана бейпилдик, өлкөбүздү ар кандай кырсыктардан коргоону дуба кылды.

Бухара эл аралык аэропортунда министрликтерге жана ведомстволорго табигый кырсыктын кесепеттерин жоюу жана калкка, фермерлерге жана ишкерлерге колдоо көрсөтүү тапшырылды.

Эске сала кетсек, 27-апрелде Өзбекстандын Бухара, Навои, Самарканд жана Кашкадария облустарында секундасына 9-40 метрге чейин жеткен шамал болгон. Натыйжада бир нече жаран жаракат алып, бирөө көз жумган. Ошондой эле, үйлөргө, унааларга, инфраструктурага жана түшүмгө ири зыян келтирген.

Булак: NazarNews.kg