Тынч океандын түштүгүндө, Токиодон болжол менен 350 километр алыстыкта, планетадагы эң таң калыштуу жерлердин бири Аогасима аралы жайгашкан. Бул аралды табигый феномен десе болот. Анткени, сейрек кездешкен эки кальдералуу вулкандуу арал болуп саналат. Андан да таң калыштуусу, ушул кратердин ичинде адамдар жашайт. Анын аянты болгону 9 чарчы километрге жакын. Калкынын саны болжол менен 170-200 адамдан турат.

Бул жерде чоң көчөлөр же ири фабрикалар жок. Жарандар жөнөкөй жашайт. Балык уулашып, айыл чарба менен алектенишет. Ошондой эле, аз сандагы туристтерди тейлейт. Баары бири-бирин билет. Жашоолору табият менен гармонияда өтөт. Тургундарда электр энергиясы, интернет жана мектеп бар. 
Аралдын тарыхы жашоонун ар дайым тынч болбогонун эскертет. Соңку ири атылыш 1780-жылдары болуп, жүздөгөн адамдардын өмүрүн алган. Ошондон бери вулкандык активдүүлүк азайган. Бирок сейсмологдор анын абалын дайыма көзөмөлдөп турушат. 

Аогасиманын башкы өзгөчөлүгү – анын эки вулкандан турган түзүлүшү. Чоң сырткы кальдера байыркы атылыштан кийин пайда болгон, ал эми анын ичиндеги кичинекей конус кийин пайда болгон.
Вулкандык табият кооптуу болгону менен, уникалдуу мүмкүнчүлүктөрдү берет. Аралда геотермалдык булактар бар. Тургундар аларды жылуулук жана тамак бышырууда колдонушат. Мисалы, фумарола деп аталган казылган жер мештерде, жердин табигый жылуулугу менен тамак бышырылат. Бул тамакка өзгөчө даам берип, Аогасиманын маданий символу болуп саналат.

Алыстыгына карабастан Аогасимага жыл сайын “вулкан ичиндеги аралды” көргүсү келген саякатчылар көп барат. Бул аралга жетүү оңой эмес. Биринчи Хатидзё аралына учуу же паром менен барып, андан кийин кичинекей кеме же вертолет менен жетүү керек.

Бул арал адам менен табият арасындагы байланышты камтыган катардагы географиялык пункт эмес, титиреген жердин үстүндө жашоо образын чагылдырган кайраттуулукту жана табияттын кооздугун айкалыштырган кереметтин үлгүсү.