Кримчөйрөдө «Женго» каймана аты менен таанымал Кадырбек Досоновго таандык уюшкан кылмыштуу топтун мүчөлөрү кармалды. Бул тууралуу Улуттук коопсуздук боюнча мамлекеттик комитеттин (УКМК) басма сөз кызматы билдирди.

Маалыматка ылайык, 21-майда К.Досоновдун уюшкан кылмыштуу тобунун 3 мүчөсү: А.У.Т., М.у.М. жана Т.Ж.А. Тажикстан—Кыргызстан—Өзбекстан эл аралык баңгизат каналына катыштыгы бар делип камакка алынган.

Алар — Ош облусунун тургундары, Тажикстан—Кыргызстан—Өзбекстан каттамы боюнча баңгизат каналын түзүшкөн деп шектелүүдө. УКМК кызматкерлери шектүүлөрдү «Азия-Ойл» май куюучу жайынан кармашкан.

Алардын «Мерседес-Бенц» үлгүсүндөгү унаасынан 1 кг 980 грамм баңгизат (болжол менен гашиш) табылган. Учурда кармалган жарандар Баткен шаарындагы убактылуу кармоочу жайга киргизилди.

Булак: NazarNews.kg